DILI, 09 outubru 2024 (TATOLI)—Autoridade Munisípiu Dili (AMD) prevee ona osan hamutuk $100.000 atu sosa karreta tanke tolu hodi bele rega jardín sira iha kapitál.
Prezidente interinu AMD, Francisco dos Santos, haktuir, AMD iha ona karreta tanke hamutuk neen ne’ebé loron-loron rega jardín sira, maibé iha tanke rua mak agora ho kondisaun a’at tanba sosa no hahú opera desde tinan 2011.
“Ami iha osan oituan de’it ba tinan oin hodi sosa karreta tanke, tanba obra públika konstrui tan jardín sira entaun ami tenke responde, hakarak ka lakohi ami tenki responde. Tanba ne’e mak ami prevee orsamentu hodi responde ba jardín sira ne’e,” Prezidente interinu AMD informa ba Agência Tatoli, Caicoli, kuarta ne’e.
Notísia relevante : AMD hein koordenasaun husi MOP atu kontrola jardin iha kapitál
Pesoál sira iha AMD sei rega jardín sira iha kapitál tanba daudaun ho kondisaun rai manas.
“Ami konsege halo rai matak no ai-hun sira ne’ebé mak hahú husi Palásiu Prezidensiál to’o Tasi-tolu. Agora ne’e ami rega loron-loron no jardín sira seluk ne’ebé iha kapitál,” nia tenik.
Ministériu Turizmu no Ambiente sei kontrola no tau-matan ba jardín foun sira iha Farol, Kampung Alor no Timor Lodge nian inklui jardín sira ne’ebé eziste ona hanesan 05 de Maiu, BJ Habibi, Francisco Xavier, jardín Colmera, Comoro, Largo Lesidere no Mandarin.
Jornalista : Jesuína Xavier
Editora : Julia Chatarina
