DILI, 20 setembru 2024 (TATOLI)– Prezidente Autoridade Munispiu (PAM) Dili, Gregório Saldanha, hateten nia parte hein hela koordenasaun ho Ministériu Obra Públika hodi kontrola jardin sira-ne’ebé reabilita hotu ona iha tinan ne’e hanesan Jardin Kampung Alor, Timor Lodge no Faról.
Gregorio Saldanha hateten, jardin sira hanesan temi iha leten seidauk iha kontrola totál husi munisipis Dili nian hodi halo jestaun no hadi’a, tanba ida-ne’e planu no projetu Ministériu Obra Públika nian.
“Ita sei haree hamutuk no koordena ho ministériu sira-ne’ebé mak hala’o uluk ona. Prosesu ne’e la’o hela iha koordenasaun, se atribui mai ona ba munisipiu Dili bele halo kontrolu no jestaun. Ami hein nafatin no serbisu nafatin saida mak mai tan. Importante mak planu sira-ne’e sai realidade,” Prezidente Autoridade Munispiu (PAM) Dili, Gregorio Saldanha, hateten iha Caicoli.
Iha sorin seluk, reprezentante husi empreza reabilitasaun jardín Faról nian, Nandinho da Costa Vieira, hateten obra reabilitasaun ba jardín Faról nia konklui kle’ur ona no entrega ona ba Governu liuhusi Ministériu Obra Públika.
“Ami entrega ona iha fulan jullu no nia manutensaun mós hotu iha jullu 2024,” reprezentante empreza Nandinho da Costa Vieira, hateten ba Agência Tatoli liuhusi WhattShapp.
Antes ne’e, Diretór kompañia ASET, Augusto Soares, hateten empreza termina ona obra reabilitasaun iha fulan haat liuba, maibé seidauk entrega ba Governu.
“Kompaña hein de’it, bainhira Governu dehan atu entrega, ami entrega de’it ona. Obra hotu ona maibé seidauk entrega,” Diretór kompañia ASET, Augusto Soares, ba Tatoli liuhusi WhatShapp.
Jornalista : Jesuína Xavier
Editór : Cancio Ximenes
