Karreta baku-fila iha Raifun rezulta sidadaun Indonézia ida mate
BOBONARO, 09 outubru 2024 (TATOLI) – Karreta baku-fila iha área Raboanan, suku Raifun, postu administrativu Maliana, munisípiu Bobonaro, rezulta sidadaun Indonézia lakon vida.
Iha loron-tersa, 08 outubru, tuku 07:20 kalan akontese asidente tráfegu karreta Hilux mutin xapa-matríkula A.15,735 baku-fila iha área Raboanan, suku Raifun, postu administrativu Maliana, munisípiu Bobonaro ne’ebé rezulta sidadaun Indonézia, Dermawan Eka Pratama idade (30), hafoin transporta ba halo tratamentu iha Ospitál Referál Maliana.
Segundu Komandante PNTL Munisípiu Bobonaro, Asistente Superintendente Polísia Joél Casemiro, haktuir karreta Hilux ne’e tula ema na’in-haat husi diresaun Odomau atu ba akampamentu Komplex iha área Ponte Bolobu.
Ema na’in-haat ne’e maioria sidadaun Indonézia ne’ebé hanesan trablladór PT Hatama Karya ba projetu reablitasaun estrada urbana Maliana vila.
Notísia relevante: Asidente iha Odomau-foho rezulta ema ida mate no 17 kanek
“Ninia motivu tuir informasaun husi kondutór no sasin balun iha momentu sira ba ne’e dehan, sira ba ne’e ho velosidade to’o iha xuvida ne’e mak nia atu redús mudansa ba 1, la konsege, entaun ida matebian ne’e tenta atu sai husi karreta, derrepente ida lori karreta ne’e husik travaun mak odomatan rasta vítima ne’e monu depois karreta hanesan,” nia informa ba Jornalista sira iha komandu PNTL Munisípiu Bobonaro, kuarta ne’e.
Hafoin akontese, komunidade sira transporta kedas vítima sira mai Hospital Referál Maliana atu halo tratamentu intensivu, maibé la konsege salva sidadaun orijen husi Jawa Tengah, Indonézia.
“Nia hakotu iis, momentu kalan ne’e kedas ita ho Xefe Kompaña Hatama Karya ho seksaun tránzitu halo deklarasaun entrega mate-isin entrega ba nia superiór sira lori ba Dili, ohin loron kontinua ba Indonézia,” nia hateten.
Enkuantu evidénsia sira hanesan karreta daudaun ne’e Seksaun Tránzitu asegura ona iha edifísiu Ministériu Públiku no motorista rasik MP aplika Termu Identidade Rezidensia (TIR).
Notísia relevante: Baskolante ida baku fila iha Odomau
Jornalista: Sérgio da Cruz
Editór: Evaristo Soares Martins
