Asidente iha Odomau-foho rezulta ema ida mate no 17 kanek
BOBONARO, 31 jullu 2024 (TATOLI) – iha loron-kuarta, tuku 04:00 dadeersan akontese asidente tráfegu singulár karreta anguna baku-fila iha Odomau-foho, aldeia Anahun, suku Odomau, postu administrativu Maliana, munisípiu Bobonaro rezulta ema ida mate no na’in-17 kanek ne’ebé kompostu husi kanek grave ka tohar ida no kanek kmaan na’in-16.
Komandante PNTL Munisípiu Bobonaro, Superintedente Xefe Agustino Gomes da Silva, esplika, karreta ne’e husi diresaun postu administrativu Bobonaro ho destinasaun atu ba kapitál Maliana.
“Kareta ne’e tula pasajeiru 18 pesoas, bainhira to’o fatin, ida tún tiha, depois kondutór sa’e ho primeira, komforme nia hatete, nia rona karreta tarutu, entaun nia sama travaun no rasta travaun liman la funsiona, kareta hakiduk ba kotuk lalais no monu no kondutór rasik monu sai husi karreta, pasajeiru seluk haksoit, seluk iha laran, asidente ne’e rezulta vítima ida mate, ida kanek grave, tohar depois 16 kanek kmaan,” nia informa ba jornalista sira iha Maliana, kuarta ne’e.
Nia subliña, ema-ne’ebé mate daudaun ne’e rai hela iha mortuáriu Hospitál Referál Maliana no ida kanek grave mos sei halo hela tratamentu iha ospitál, enkuantu sira-ne’ebé kanek kmaan daudaun ne’e fila ona ba uma.
Komandante ne’e hatutan, motorista daudaun ne’e asegura hela iha kuartél PNTL munisípiu Bobonaro.
“Prosesu hanesan bainbain prosedimentu ne’ebé durante ne’e hala’o ona, la’o tuir ida-ne’e, ita aprezenta ba Ministériu Públiku mak depois ita hein,” nia katak.
Nia dehan, asidente ne’e sai hanesan referénsia ba motorista hotu-hotu ne’ebé konduz karreta no motorizada iha munisípiu Bobonaro ho kuidadu nune’e bele to’o fatin destinasaun ho seguru.
“Tula pasajeiru karik tenke ser haree kapasidade karreta, haree kondisaun karreta, depois labele halai iha kalan, hanesan akontese horikalan, depois haree kondisaun dalan, hodi kuidadu pasajeiru ne’ebé tula ne’e ho di’ak atubele to’o destinasaun ho seguru,” nia fó hanoin.
Notísia relevante: Baskolante ida baku fila iha Odomau
Jornalista: Sérgio da Cruz
Editór: Evaristo Soares Martins
