DILI, 09 outubru 2024 (TATOLI) – Prezidente Repúblika, José Ramos-Horta, kuarta ne’e, iha Canberra Austrália hasoru malu ho Governadór-Jerál Austrália, Sam Mostyn AC, iha nia rezidénsia hodi ko’alia kona-ba kooperasaun bilaterál.
“Iha hasoru malu ne’e diskute kona-ba asuntu bilaterál entre nasaun rua ne’e, hodi rekoñese sira-nia estatutu nu’udar nasaun viziñu ne’ebé iha ligasaun metin ho istória Timor-Leste nian,” tenik iha nota ne’ebé Agência TATOLI asesu husi media Prezidensia Repúblika, ohin.
Iha enkontru ne’e, Prezidente Ramos-Horta hato’o agradesimentu ba apoiu Austrália nian ba Timor-Leste iha área oin-oin ne’ebé durante ne’e la’o hela.
Espesifikamente nia rekoñese Austrália nia asisténsia durante Papa Francisco nia vizita mai Timor-Leste iha inísiu fulan-Setembru tinan ne’e.
Governadór Jerál mós aproveita oportunidade hodi hato’o nia konfiansa ba Xefe Estadu atuál.
Nia espresa nia konfiansa iha Prezidente Ramos-Horta nia kompromisu atu kontinua promove demokrásia no defende direitus umanus.
Enkontru ida ne’e entre Prezidente Timor-Leste ho Governadór-Jerál Austrália destaka relasaun diplomátika ne’ebé la’o hela entre nasaun rua ne’e.
Ida-ne’e hatudu sira nia interese mútuo hodi mantein komunikasaun nakloke no haburas kooperasaun bilaterál.
Jornalista: Hortencio Sanchez
Editór: Florencio Miranda Ximenes
