COVALIMA, 14 Outubru 2024 (TATOLI) – Gabinete Planeamentu Estratéjiku, Ministériu Interiór (MI) halo konsulta públika kona-ba realiñamentu Planu Estratéjiku Seguransa Interna (PESI) hodi hadi’a, hametin no habelar serbisu atu alkansa vizaun seguransa interna 2025-2040 ho autoridade sira iha Covalima.
Diretór Gabinete Planeamentu Estratéjiku MI, Hélder Soares, dehan ministériu halo konsulta públika hodi rona ideia husi autoridade sira kona-ba seguransa interna.
“Ita presiza halo konsulta ho autoridade munisipál liga ba seguransa interna, tanba sira mak hatene liu situasaun. Nune’e, sira fó ideia ba Ministériu Interiór atu elabora Planu Estratéjiku Seguransa Interna hodi entende situasaun ne’ebé enfrenta iha terrenu”, Hélder Soares hato’o ohin.
Atividade konsulta públika ne’ebé hala’o iha territóriu ne’e kona-ba realiñamentu Planu Estratéjiku, tanba PESI ba 2011-2030 ho mudansa polítika 2016 paradu. Tanba ne’e, Governu hakarak kontinua halo konsulta ba PESI 2025-2040, nune’e komunidade bele moris iha nia rai ho seguru katak la’o livre no la hetan ameasa ruma.
Dirijente ne’e esplika katak ministériu halo konsulta sobre PESI la’ós tanba la kondís ona ho situasaun, maibé presiza rekolla tan informasaun iha baze, tanba ko’alia sobre seguransa la’ós iha autoridade seguransa sira de’it, maibé ema hotu iha responsabilidade.
Atividade ne’e hanesan kontinuidade ne’ebé hahú uluk ona iha munisípiu sira iha parte leste ne’ebé autoridade aprezenta problema kona-ba rai, violénsia doméstika, arte marsiál no seluk tan.
Segundu Komandante PNTL Covalima, Superintendente Asistente Inácio Amaral, dehan atividade ne’e importante, tanba atu haree planu seguransa nian iha futuru. “Ita hotu hamutuk kria pás no estabilidade iha ita-nia munisípiu Covalima. Presiza ita hotu nia kontribuisaun maske situasaun la’o durante ho ambiente hakmatek, maibé ba futuru seguransa hakarak di’ak liután”, nia afirma.
Reprezentante Prezidente Autoridade Covalima (PAM), Caetano Ribeiro, reforsa katak konsulta públika ne’e atu ko’alia sobre seguransa interna hodi kontrola sidadaun estranjeiru ne’ebé tama ho ilegál.
“Ita hatene katak Covalima fronteira ho nasaun viziña Indonézia. Ita presiza atu kontrola sidadaun estranjeiru ne’ebe tama ho dalan ilegál, dalaruma bele lori arma, narkótika no seluk, nune’e presiza diskute ho sériu”, dehan.
Notísia relevante: MI konsulta planu estratéjiku seguransa interna 2025-2040 iha Bobonaro
Jornalista: Celestina Teles
Editora: Maria Auxiliadora
