BOBONARO, 22 agostu 2024 (TATOLI)-Gabinete planeamentu estratéjiku hosi Ministériu Interior (MI), kinta ne’e konsulta alinamentu planu estratéjiku seguransa interna tinan 2025-2040 ho autoridade munisipál, administradór postu, líder komunitária, veteranu, komandante eskudara Polísia Nasionál Timor-Leste no entidade relevante sira iha munisípiu Bobonaro.
Koordenadór Gabinte Planeamentu Estratéjiku MI, Bendito José Casemiro, esplika tuir loloos planeamentu seguransa interna hahú halo iha 2011 ba 2030, maibé prosesu ne’e labele hala’o to’o 2030 tanba kestaun polítika, mudansa governasaun.
Notísia relevante: MI sosializa lei migrasaun no azilu iha Bobonaro
“Ninia prosesu ne’e paradu iha 2016, momentu ne’ebá Ministéru Interiór hanesan Sekretáriu Estadu Seguransa nia mak hahú hala’o prosesu ida-ne’e, maibé agora ami mai halo fali realinamentu ou reajustamentu husi 2025 mai to’o 2040,” nia informa ba jornalista sira iha salaun Maria-Tapo.
Nia dehan, workshop ne’e realiza ho objetivu atu reajusta fila-fali situasaun ne’ebé uluk la’o tiha hodi hametin no habelar liután seguransa internu iha baze, tanba seguransa presiza ema hotu-hotu nia tulun, intermu kooperasaun no komunikasaun.
Tuir nia, planu estratéjiku ne’e hanesan matadalan ida oinsá atu lori seguransa ne’e ba oin ho diak liután, sein difikuldade ka hasoru problema ruma.
“Asaun ida oin mai ne’e atu konvense de’it, bolu ema hotu-hotu mai atu fó hanoin, ideia ruma atubele dezenvolve liután seguransa ne’e ba oin ho di’ak,” nia katak.
Sekretáriu Autóridade Munisipál Bobonaro ba Asuntu Administrasaun no Finansa, Domingos da Costa, konsidera planu estratéjiku seguransa interna ne’e importante tebes tanba munisípiu Bobonaro halo parte iha fronteira ho nasaun viziñu Indonézia.
“Ida-ne’e posiblidade boot ba ita hotu atu tau hanoin, haree saida mak ladi’ak ita tenke ko’alia, atu nune’e bele reforsa, planu sira-ne’e presiza hotu-hotu nia hanoin, nune’e bele hetama iha planu estratéjiku ne’e,” nia katak.
Enkuantu atividade ne’e faze dahuluk hala’o ona iha munisípiu neen hanesan Manatuto, Baucau, Viqueque, Lospalos, Ermera no Liquiçá no sei implementa mos iha munisípiu sira seluk, hafoin vizita Papa Fransisco mai Timor-Leste.
Notísia relevante: Governu aprezenta planu estratéjiku militár ba Prezidente Repúblika
Jornalista: Sérgio da Cruz
Editór: Evaristo Soares Martins
