EBF Rai-Klaran akumula estudante 88 iha saladeaula ida
BOBONARO, 16 outubru 2024 (TATOLI) – Ensinu Báziku Filiál (EBF) Rai-Lakan, aldeia Purugua, suku Ilat-Laun, postu administrativu Bobonaro, munisípiu Bobonaro, durante ne’e enfrenta problema menus sala aula, nune’e obrigatóriu akumula estudante na’in-88 iha aula ida de’it ka multi klase.
Koordenadór EBF Rai-Lakan, Helena Soares, informa, eskola ne’e iha sala tolu ne’ebé fahe sala ida ba primeiru no segundu anu ho totál estudante 88 no sala rua seluk ba terseiru ho kuartu anu.
Nia subliña, totál estudante iha EBF ne’e na’in-123 kompostu husi primeiru anu na’in-33, segundu anu 55, terseiru 25 anu kuartu anu 20.
Notísia relevante: ME sei konstrui-reabilita eskola 15 iha Bobonaro inklui EBC Tapo
“Ami iha sala tolu de’it, entaun hakarak ka lakohi primeiru anu ho segundu akumula iha fatin ida de’it, tanba de’it fatin lato’o, ami hanorin oras ba primeiru anu depois oras ida ba segundu anu fali, maibé ida ne’e ami senti hanorin ladún di’ak tanba estudante barak liu, barulu, balu laiha konsentrasaun ba matéria ne’ebé profesór esplika,” nia informa ba Jornalista sira, iha kna’ar fatin, kuarta ne’e.
Koordenadora Helena dehan relasiona ho problema menus sala aula ne’e, obrigatóriu estudante husi kintu anu kuaze na’in 10-resin tenke muda ba eskola fali iha EBF Ilat-Laun.
“Sira la’o husi ne’e ba to’o EBF Ilat-Laun, la’o do’ok maizumenus kilómetru tolu, kuandu tempu udan mota-boot sira labele ba eskola tanba ponte laiha, ami husu ba Governu halo konstrusaun foun, depois 2025 ami hakarak kaer metin kintu anu iha-ne’e,” nia katak.
Profesór eskola EBF Rai-klaran, Julito Barreto, reforsa iha tempu bailoro ensinu no aprendizajen la’o normál, maibé tempu-udan sala balu tenke abandona, tanba nia rasik ho estudante balu hela iha mota-sorin.
“Ami sujere ba Governu ho tempu badak atu haree netik ami-nia kondisaun hirak-ne’e, atubele hala’o ami-nia kna’ar hanesan estudante no manorin atubele hala’o ensinu aprendizajen ho di’ak, maske tempu udan,” nia hateten.
Xefe suku Ilat-Laun, Adelino Mau Bere, preokupa ho sistuasaun ne’e, nune’e nia rekomenda ba Ministériu Edukasaun atu tau iha planu prioridade tinan 2025 atu konstrui eskola foun hodi aumenta tan sala aula nune’e bele akumula estudante primeiru siklu no segundu siklu iha de’it EBF Rai-Lakan.
“Alunu sira-ne’e maske avansa ona ba kintu anu, maibé sira ne’e sei ki’ik, labele hakat ba leten tanba udan mota-boot, entaun tenke aumenta sala nune’e aguenta to’o sestu anu eskola iha-ne’e de’it,” nia katak.
Enkuantu durante ne’e manorin ne’ebé hanorin estudante EBF Rai-Lakan hamutuk na’in haat.
Notísia relevante: Eskola 12 iha Bobonaro preparadu halo inaugurasaun
Jornalista: Sérgio da Cruz
Editór: Evaristo Soares Martins
