LISBOA, 17 outubru 2024 (TATOLI) – Governu liuhusi Ministériu Interiór (MI) kontinua kooperasaun ho Ministériu Justisa Portugál ho objetivu atu reforsa sistema segerunsa migrasaun iha portál entrada fronteira Timor-Leste.
Ministru Interiór, Francisco da Costa Guterres, esplika, kooperasaun iha área referida nu’udar parte asaun kontinuasaun ba serbisu bilaterál entre institusaun rua ne’ebé antes ne’e hala’o ona kooperasaun programa estratéjiku ba tinan-haat.
“Ita husu apoia ba Governu Portugál hodi haree ba situasaun sira-ne’ebé ligadu ho serbisu migrasaun ne’ebé iha relasaun ho pasaporte hanesan identifika krime organizadu no falsifika dokumentu,” Ministru Interiór informa ba Agência Tatoli iha Liboa, kuarta ne’e.
Serbisu hamutuk entre ministériu rua foka liu ba área dezenvolvementu sistema migrasaun iha portál entrada Timor-leste nian iha fronteira rai-maran no aeroportu, serbisu hamutuk iha área investigasaun kriminál hanesan Polísia Investigasaun Kriminál ne’ebé konsideradu inportante liuliu ligadu ho movimentasaun iha fronteira.
Nune’e mós futuru bele halo identifikasaun bainhira deskonfia mosu krime organizadu no tráfiku umanu.
“Ministra Justisa Portugál, Rita Júdice disponivel tebes atu apoia Timor-Leste iha área sira-ne’e,” Francisco Guterres akresenta.
Nia dehan, Timor-Leste nia sistema kontrola iha migrasaun foin báziku nune’e ho kooperasaun entre instituisaun rua iha futuru bele kria sistema ne’ebé mais altu ne’ebé hanaran sistema kontrola fronteira.
Sistema referida iha funsaun deteta movimentu tama-sai iha portaun entrada, bele deteta dokumentu ne’ebé falsifika inklui kriminozu internasionál sira-ne’ebé falsifika fizikamente hanesan oin no seluk tán.
Nune’e mós nu’udar bazededadus, istória vizita no infromasaun seluk relasiona ho migrasaun hanesan bele alarme ba turista sira antes loron-tolu vistu remata iha Timor-Leste.
Programa kooperasaun ne’e ho objetivu jerál hakarak asegura fronteira antes Timor-Leste sai membru permanente iha ASEAN tanba sei laiha limitasaun ba movimentu entre nasaun tanba akrodu merkadu livre.
“Ita prevene antes akontese situasaun ne’ebé ita la espera,” Francisco Guterres hakotu.
Governu Timor-Leste ho Portugál asina ona nota kooperasaun ho objetivu kontribui ba dezenvolvementu sustetável ne’ebé foka ba área prioridade no halo intervensaun ba área ‘clusters’ sira inklui setór seguransa ne’ebé hola parte iha Ministéiru Interiór nia responsabilidade.
Programa tinan-haat referida sei inklui asuntu transversál hanesan igualidade jéneru, reforsa sosiedade sivíl, formasaun lian portugés ne’ebé intergradu hotu iha área intervensaun nian ho totál orsamentu inisiál millaun $75.
Notísia relevante: Timor-Leste no Portugál hametin kooperasaun iha setór justisa
Jornalista : Natalino Belo
Editór : Evaristo Soares Martins
