Timor-Leste no Portugál hametin kooperasaun iha setór justisa
LISBOA, 16 outubru 2024 (TATOLI) – Governu Timor-Leste liuhusi Ministru Justisa (MJ), Sérgio Hornai, tersa ne’e, hametin kooperasaun iha setór justisa, hanesan kapasitasaun rekursu umanu, estudu komparativu iha futuru.
Ministru Justisa, Sérgio Ornai, esplika, sormutu entre Timor-Leste ho Portugál relasiona ho akordu kooperasaun iha área justisa ne’ebé asina ona nota kooperasaun entre nasaun rua nune’e objetivu reuniaun referda hodi ajuda proposta programa bazea ba situasaun real iha Timor-Leste.
“Matéria inportante iha sorumutu ne’e mak kapasitasaun iha área rekursu umanu, hanesan formasaun inísiu no kontinuasaun hodi hasa’e koñesimentu ne’ebé konsideradu importante,” Ministru Justiasa hateten iha Lisboa, tersa ne’e.
Governu Timor-Leste ho Portugál iha akordu kooperasaun ba tinan-haat, 2024 to’o 2028 nune’e iha área justisa sei foku ba reforma institusaun, kapasita jurista, porkuradór, defensór publiku no advogadu sira iha futuru.
Nune’e mós hasa’e kualidade atendimentu iha Rejistu Notariadu no kooperasaun entre instituisaun Polísia Sentifika Investigasaun Kriminál (PCIC, sigla portugés).
Nia dehan, kapasitasaun rekursu umanu nu’udar parte inportante hanesan formasaun ba PCIC, troka esperiénsia ba malu inklui halo estudu komparativu no prátika iha área justisa.
“Durante tinan-haat ba oin ita implementa ona akordu sira-ne’e, liuliu iha área temátika justisa hodi fortifika instituisaun sira hanesan Tribunál, Ministériu Publiku no seluk tan,” Sergio Ornai akresenta.
Ministru Justisa espera liuhusi kooperasaun entre institusaun rua Timor-Leste ho Portugál bele iha rezultadu pozitivu nune’e bele konsolida no intergadu hanesan baze fundamentu iha setór justisa.
Governu Timor-Leste ho Portugál asina ona nota kooperasaun ho objetivu kontribui ba dezenvolvementu sustentável ne’ebé foka ba área prioridade no halo intervensaun ba área ‘clusters’ sira inklui setór justisa.
Programa tinan-haat ne’e sei inklui asuntu transversál hanesan igualdade jéneru, reforsa sosiedade sivíl, formasaun lian portugés ne’ebé intergradu hotu iha ‘area intervensaun nian ho totál orsamentu inisiál millaun $75.
Notísia relevante: Ministériu Edukasaun mantein kooperasaun ho Institutu Camões iha área formasaun
Jornalista : Natalino Belo
Editór : Evaristo Soares Martins
