COVALIMA, 17 Outubru 2024 (TATOLI) – Rede Feto Timor-Leste organiza konferénsia munisipál ba-daneen ho tema “Feto Dezenvolvimentu no Kontemporaneidade” no subtema “Feto no dezenvovimentu aliserse ba iha família ho nasaun”, iha Covalima.
Iha konferénsia ne’e sei diskute temátiku prinsipál ualu mak hanesan feto no justisa, edukasaun kualidade ba ema hotu, saúde ba feto no família, diversifikasaun no empoderamentu ekonómiku ba feto, partisipasaun feto iha vida públika no polítika, inkluzividade no asuntu sosiál, feto iha meiu ambiente no mudansa klimátika no abordajen integradu jéneru.
“Ita deside atu diskute temátiku ualu bazeia ba kontestu atuál, tanba feto la’ós de’it ko’alia kona-ba nia asuntu, maibé oinsá mak nia bele kontribui ba iha asuntu integradu iha ita-nia nasaun”, Prezidente Rede Feto Timor-Leste, Zélia Fernandes, dehan iha salaun AMC, ohin.
Nune’e, Rede Feto deside asuntu ualu ne’e ho intensaun atu aborda ho kle’an hodi akumula feto sira-nia preokupasaun liga ba tópiku sira ne’e, tanba kongresu ba dahuluk to’o dalimak feto Timor-Leste deside temátiku hitu mak feto no justisa, feto no edukasaun, saúde, polítika no vida públika, ekonomia no inkluzaun sosiál no feto iha desentralizasaun, maibé feto iha desentralizasaun la presiza sai ona área temátika no bele inklui iha feto iha polítika.
Kongresu Munisipál Feto Timor-Leste ba-daneen atu rona hanoin sira kona-ba feto iha meiu ambiente no mudansa klimátika no abordajen integradu jéneru hodi prevee orsamentu.
Eventu ne’e sei aprezenta mós rezultadu monitorizasaun iha área temátika ne’ebé rekomenda iha área justisa atu halo revizasaun ba kódigu penál, tanba la kriminaliza insestu no rekoñesimentu sertidaun relijiaun seluk atu konsidera.
Konferénsia ne’e, fó oportunidade ba feto sira husi kamada oioin hodi hasoru malu iha nivel munisipál atu identifika no konfere prioridade feto sira-nian, nune’e bele lori bá iha kongresu nasionál ba-daneen atu hili delgada kada munisípiu 12, inklui RAEOA atu partisipa kongresu Nasionál Feto Timor-Leste hodi prodús plataforma asaun foun ba feto Timor-leste.
Komandante PNTL Covalima, Superintendente Calisto Gonzaga, dehan feto importante iha konstrusaun Estadu, tanba envolve aan iha polítika no la’ós mane de’it, maibé presiza estuda nune’e sai feto ne’ebé forte hodi hatudu nia imajen bele kompete ba xefe suku no feto mós lidera ona Parlamentu Nasionál. Tanba ne’e, feto presiza envolve iha partidu polítiku atu kompete sai membru Governu no seluk tan.
Komandante enkoraja feto sira labele lakon oportunidade atu aprende iha kualkér área, tanba realidade feto iha PNTL laiha tempu atu tuir formasaun hodi kapasita nia aan tan de’it halo jestaun ba família ladún di’ak.
Reprezentante Prezidente Autoridade Munisípiu Covalima, Caetano dos Santos Ribeiro, reforsa katak feto forte, nasaun forte, tanba feto mak bele haburas nasaun liuhusi hahoris labarik.
“Feto tenke forte nafatin atu envolve iha vida polítika hodi sai membru Governu, prezidente Parlamentu Nasionál hodi reprezenta feto iha Timor-Leste no mai iha munisípiu feto barak asume kargu sai diretora munisipál hodi lidera serbisu”, dehan.
Nia sujere mós atu fó formasaun ba feto sira hodi hamosu konseitu liuhusi programa oioin no estabelese grupu feto hodi hanoin programa foun atu halo dezenvolvimentu ba nasaun.
Notísia relevante: Rede Feto aban realiza konferénsia munisipál iha Baucau
Jornalista: Celestina Teles
Editora: Maria Auxiliadora
