DILI, 02 outubru 2024 (TATOLI)–Prezidente Konsellu Rede Feto Timor-Leste, Zelia Fernandes, informa hahú aban iha munisipiu Baucau realiza konferensia munisipal hamutuk ho feto sira iha nível baze hodi halo diskusaun no konsultasaun ba feto sira iha Timor-Leste kona-ba oinsa promove igualdade jéneru no hakbiit feto.
“Konferénsia munisipál sei hala’o iha munisipiu hotu-hotu ne’ebé aban sei hahú iha Baucau durante loron rua. Semana oin, realiza iha munisipiu Viqueque ne’e iha segunda no tersa no Lautem iha kuarta no kinta, no hanesan mós munisipiu sira seluk ne’ebé sei lori la’o durante semana neen nia laran, molok atu realiza kongresu nasionál feto Timor-Leste,” Prezidente Konsellu Rede Feto Timor-Leste, Zelia Fernandes, hateten ba jornalista sira liuhusi konferénsia imprensa, iha Caicoli.
Iha konferénsia munisipal ne’e sei aprezenta rezultadu monitorizasaun plataforma asaun feto Timor-Leste nian, ne’ebé submete ona ba iha Governu hodi ko’alia uitoan kona-ba Governu ninia implementasaun ba rekomendasaun sira-ne’e to’o ona iha ne’ebé.
“Ita monitoriza ona nia implementasaun iha nivel munisipiu sira no mós iha nasionál. Ita hakarak aprezenta fila-fali rezultadu ida-ne’e hanesan valida fila-fali, atinjimentu sira-ne’ebé ita aborda iha relatóriu ne’e reflete iha nivel baze ka munisipiu. Ho ida-ne’e bele rona informasaun adisionál ruma, tanba dalaruma ami la konsege hasoru sira,” nia dehan.
Iha konferénsia munisipál mós sei hili delegada husi munisipiu sira hodi bele tuir kongresu nasionál ba feto iha dezembru 2024.
Liuhusi konferénsia ne’e, sei dokumenta iha plataforma asaun feto Timor-Leste nian hodi entrega ba Governu liuliu Sekretária Estadu Igualdade Jéneru no Inkluzaun hodi tau prioridade iha planu no programa.
Vise Prezidente Konsellu Rede Feto Timor-Leste, Judith Dias, hateten konferénsia munisipál sei partisipa feto sira iha área oioin hanesan agrikultór, saúde, polítika, edukasaun no empreendedorizmu no asosiasaun feto husi nivel aldeia no suku iha mumisípiu sira.
Iha konferénsia ne’e mós sei aborda tematika ualu (8) ba partisipante sira no sei diskute rezultadu konferénsia munisipál atu haree nesesidade iha nivel munisipiu ne’ebé seidauk diskute.
Área temátika ualu ne’ebé sei diskute iha konferénsia munisipál mak hanesan justisa, edukasaun, saúde, ekonomia no empregu, polítika no vida públika, inkluzaun sosiál, ambiente no mudansa klimátika no integrasaun jéneru no halo mos identifikasaun hodi hili delegada atu partisipa kongresu nasionál.
Judith Dias dehan, Rede Feto Timor-Leste nu’udar rede organizasaun ne’ebé serbisu atu promove igualdade jéneru no hakbiit feto liuhusi advokasia rede servisu, fortalesimentu institusionál no harii kapasitasaun.
Jornalista : Jesuína Xavier
Editór : Cancio Ximenes
