DILI, 23 outubru 2024 (TATOLI)–Governu liuhusi Ministériu Asuntu Kombatente Libertasaun Nasionál (MAKLN) taka sai lista Kombatente Libertasaun Nasionál rejistadu tinan 2009, iha tinan oin.
“Ami planeia taka sai lista iha tinan oin tanba foin konklui nia prosesu sira hotu. Hein katak laiha reklamasaun husi kombatente nune’e ita bele halo pagamentu. Númeru ida-ne’e husi totál kombatente 124.782,” Ministru Asuntu Kombatente no Libertasaun Nasionál, Gil da Costa Monteiro ‘Oan Soru’, hateten, iha salaun Tres Maubai, Comoro, tersa (22/10).
Notísia relevante : Governu komprometidu halo pagamentu ba veteranu rejistadu 2009 iha 2025
Tinan oin sei taka rihun 30-resin, ne’ebé antes ne’e MAKLN planeia tau orsamentu iha tinan 2024 maibé la konsege realiza tanba Tribunál la aseita no ninia prosesu sei la’o hela. Tanba ne’e, bazeia ba Governu nia polítika no planu sei prevee orsamentu referidu ba tinan oin.
Iha Estatutu Kombatente Libertasaun Nasionál, lei númeru 3/2006 iha artigu 13 ne’e hateten kona-ba rejistu kualidade husi Kombatente Libertasaun Nasionál.
MAKLN rasik prevee ona millaun $99 ba Kombatente Libertasaun Nasionál rejistadu tinan 2009.
Jornalista : Osória Marques
Editora : Julia Chatarina
