DILI, 23 outubru 2024 (TATOLI)–Ministru Asuntu Kombatente no Libertasaun Nasionál, Gil da Costa Monteiro ‘Oan Soru’, hateten, pagamentu ba Kombatente Libertasaun nia oan sei hahú iha fulan-novembru.
“Veteranu nia oan ne’ebé konkorre ba bolsa estudu ne’e kuandu naran sai tuir kritériu ne’ebé Ministériu Asuntu Kombatente Libertasaun Nasionál (MAKLN) fó sai mak ita sei implementa iha fulan-novembru tinan ne’e. Ita presiza de’it bolseiru 1.300 no kada munisípiu iha kuota 100. Governu aloka osan hamutuk $1.127.750,” Ministru informa iha salaun Tres Maubai, Comoro, tersa (22/10).
Notísia relevante : Konsellu Veteranu loke inskrisaun ba kombatente nia oan sira asesu ba bolsa estudu
Atribuisaun bolsa estudu ba veteranu nia oan ne’e ba kada tinan, bazeia ba rejime atribuisaun bolsa estudu ba veteranu no mártir libertasaun nasionál nia oan, nune’e iha tinan letivu ne’e, ministériu tutela hasai ona despaisu númeru 02/MAKLN-IXGC/1/2024 ne’ebé hatuur kedas númeru ba vaga sira ne’ebé hakerek iha númeru 2, husi despaisu ne’e bazeia ba nível ensinu sira.
Bolsa estudu ne’e atribui ba estudante husi ensinu báziku to’o ensinu superiór, kompostu husi ensinu báziku siklu 1° hamutuk 65 ba kada munisípiu ema na’in-lima, ensinu báziku siklu 2° no 3º hamutuk 195 kada munisípiu ema na’in-15, ensinu sekudáriu hamutuk 325 kada munisípiu na’in-25, ensinu superiór univerisitáriu Timor-Leste hamutuk 350 kada munisípiu ema na’in-50 no ensinu superiór iha rai-li’ur na’in-65 kada munisípiu na’in-lima.
Ba ensinu báziku siklu 1º kada bolseiru sei hetan osan ho montante $300, ensinu báziku siklu 2° no 3º hetan $600, ensinu sekundáriu hetan $650, ensinu superiór Univerisitáriu Timor-Leste hetan $1.000, no Ensinu Superiór iha rai-li’ur hetan $2.000.
Jornalista : Osória Marques
Editora : Julia Chatarina
