DILI, 25 outubru 2024 (TATOLI)– Loron nasionál feto Timor-Leste ba dala-48 ne’ebé sei akontese iha 3 Novembru tinan ne’e, nune’e Sekretária Estadu ba Igualdade (SEI) organiza hodi kolabora ho Ministériu Saúde (MS) hodi halo asaun doasaun ran.
Iha atividade doasaun ran ne’e instituisaun Polísia Nasionál Timor-Leste (PNTL) mak oferese no funsionáriu Sekretária Estadu ba Igualdade nian.
“Nune’e loron ohin Sekretáriu Estadu ba Igualdade ne’ebé servisu hamutuk ho Ministériu Saúde, hodi hala’o atividade dorasaun ran tanba ran turuk ida bele salva inan ida nia vida, importante no ida-ne’e ita halo hodi ajuda ospitál nune’e bele ajuda fali ba pasiente ne’ebé presiza”, Diretór Jerál SEI, Armando da Costa, dehan ba jornalista sira, hafoin halo abertura ba doasaun raan, iha Timor Plaza, Dili, sesta ne’e.
Objetivu hosi Doasaun ran ne’e atu ajuda komunidade ne’ebé presiza ran, tanba liuhusi ran turuk ida bele ajuda no salva ema nia ida no doasaun ran ne’e nakloke ba komunidade ne’ebé hakarak bele hakbesik hodi oferese turuk ida.
Xefe departamentu Banco de sangue, Alex Mendonca dehan asaun ida-ne’e pozitivu tebes tanba bele ajuda pasiente ne’ebé presiza iha ospitál nasionál.
“Agradese ba kolajoborasaun ida-ne’e tanba liuhusi atividade ida-ne’e bele ajuda pasiente iha ospitál no asaun ida-ne’ebé ita-boot sira halo hola parte hotu ba saúde iha ita-nia liman. Espera katak ba oin instituisaun estadu kontinua halo atividade doasaun ran nune’e bele ajuda ema ne’ebé mak presiza ran. Tanba dala barak pasiente hosi Munisípiu mai presiza ran”, nia dehan.
Iha atividade doasaun ran ne’e hetan apoiu fatin ne’e hosi Timor Plaza no doasaun ne’e nakloke ba ema hotu.
Jornalista :Osória Marques
