PR kondekora eis-embaixadór Portugal ho medalla “Ordem Colar de Timor-Leste

DILI, 28 outubru 2024 (TATOLI)– Prezidente Repúblika, José Ramos Horta, kondekora ho medalla Ordem Colar de Timor-Leste nian, hanesan  onra aas liu nasaun nian, ba eis-embaixadór portugés na’in-rua, hanesan Pedro Luís Baptista Moitinho de Almeida no João Nunget Ramos Pinto iha serimónia ida ne’ebé hala’o iha Ótel Palácio iha Cascais Portugal foin lalais ne’e.

Tui nota ne’ebé ajénsia TATOLI, I.P asesu katak kondekorasaun ne’e estabelese husi Dekretu Prezidensiál numeru. 109/2024, iha loron 15 Outubru, rekoñese méritu no dedikasaun estraordináriu hUsi embaixadór na’in-rua durante hala’o kna’ar, nu’udar xefe ba Misaun Diplomátika Portugál iha Díli.

Ho diplomata na’in-rua nia esforsu sai instrumentál hodi hametin relasaun bilaterál sira no promove amizade entre nasaun rua ne’e.

Medalla Ordem Colar de Timor-Leste nian, ne’ebé kria husi Dekretu-Lei numeru, 20/2009, rekoñese indivíduu sira ne’ebé presta ona servisu signifikativu ba nasaun ka umanidade liuhusi promove pás, estabilidade, no progresu iha Timor-Leste.

Serimónia ne’e hala’o durante vizita servisu Estadu husi Prezidente Ramos Horta nian ba Portugal iha loron 22 to’o 29 Outubru 2024.

“Omenajen ne’e espresa ami nia rekoñesimentu ba kna’ar esensiál ne’ebé embaixadór na’in-rua hala’o hodi promove relasaun fraternu sira entre Timor-Leste ho Portugál. Sira nia dedikasaun no lideransa hametin ona ita nia diplomasia no lori benefísiu konkretu ba povu timoroan”, refere nota ne’e.

Jornalista: Hortencio Sanchez

Editór: Florencio Miranda Ximenes