BOBONARO, 04 novembru 2024 (TATOLI) – Komandu Polísia Nasionál Timor-Leste (PNTL), kontinua buka tuir suspeitu ne’ebé envolve kazu asalta komunidade iha aldeia Kosál, suku Saburai, postu administrativu Maliana iha loron, 02 fulan-novembru ne’e.
Komandante PNTL Muníspiu Bobonaro, Superintendente Xefe Agustino Gomes da Silva, informa, suspeitu ba kazu ne’e identifikadu maibé to’o agora seidauk konsege halo detensaun tanba família, viziñu lakohi fó informasaun ba autoridade seguransa.
Notísia relevante: Janeiru-agostu 2024, PNTL Bobonaro rejista kazu 222 iha MP
“Ita foti ona deklarasaun husi lezada, Seksaun Imvestigasaun Kriminál elabora, dezenvolve hela informasaun sira-ne’e, sei aprezenta kazu ne’e ba Ministériu Públiku husu mandadu buska hodi halo asaun polisiál,” nia informa ba Jornalista sira iha Kuartél PNTL Munisípiu Bobonaro, segunda ne’e.
Superintendente Xefe Agustino Gomes da Silva, informa, kazu ne’e akontese iha selebrasaun loron finadu, bainhira grupu organizadu boot ida, organiza malu, uza motorizada ba asalta aldeia seluk no halo kanek komunidade.
Nia hatutan, liu tiha loron ne’e, grupu organizadu referida kontinua halo embuskada ba komunidade ne’ebé movimentu no tenta atu oho ka hakotu ema-nia vida.
Liga ho kazu ne’e, Komandante Agustinho, afirma autoridade seguransa sei kontinua halo asaun polisiál ne’ebé proporsionál no represivu hodi fó lisaun ba kriminozu sira, tanba asaun ne’ebé akontese iha aldeia Kosál, suku Saburai ne’e la’ós foin primeira vez.
“Asaun ne’e repetidu, halo impedimentu halo ameasa, tenta atu oho ema, dala barak tiha ona, mas ha’u hanoin sira tenke para ona ho sira-nia atitude aat ne’e, ba oin sira sei halimar, depois sira sei haree no konsekuénsia atitude a’at ne’ebé maka sira halo,” nia hateten.
Komandante PNTL Bobonaro ne’e fó-sai katak, durante selebrasaun loron finadu situasaun seguransa iha munisípiu Bobonaro la’o ho di’ak, konduzivu, kontroladu, tanba membru PNTL ne’ebé koloka iha kapitál munisípiu, postu administrativu no suku hotu hala’o servisu ho di’ak.
“Ninia rezultadu maka ita komunidade rasik haree saida mak membru PNTL halo iha terrenu no operasaun nível territoriál ne’e, ha’u deklara termina ona,” nia katak.
Enkuantu ekipa konjunta kompostu hosu Unidade Espesiál Polísia (UEP) no Seksaun Rezerva Intervensaun Rápida komandu munisípiu Bobonaro ne’ebé kolokadu halo seguransa iha suku Lourba, Karabau no Tebabui ne’e mós retira ona, maibé membru komandu eskuadra postu administrativu Bobonaro mak sei kontinua kontrola iha terrenu.
Durante selebrasaun loron finadu ne’e, Seksaun Tránzitu Rodoviária Komandu Polísia Munisípiu Bobonaro mós serbisu hamutuk Diresaun Transporte Terrestre Munisípiu Bobonaro konsege halo apreensaun ba veíkulu privadu 61 ne’ebé viola dekretu-lei kódigu estrada.
Iha atividade auto stop ne’e PNTL mós la deteta sirkulasaun transporte estadu nia.
Notisia relevante: Janeiru-agostu 2024, PNTL Bobonaro halibur reseita $32,544
Jornalista : Sérgio da Cruz
Editór : Evaristo Soares Martins
