COVALIMA, 08 Novembru 2024 (TATOLI) – Progresu konstrusaun fízika ba projetu husi Programa Dezenvolvimentu Integradu Munisipál (PDIM) ne’ebé implementa iha postu administrativu Maucatar, Suai, Fohorem no Zumalai, foin atinje 52%.
Diretór Servisu Munisipál ba Planeamentu Integradu no Dezenvolvimentu iha Covalima, Carlito Barros dos Reis, hateten projetu sira ne’e foin atinje 52%, tanba foin implementa iha Agostu 2024.
“Iha implementasaun projetu, tékniku husi PDIM halo monitorizasaun ba projetu ualu. Ami observa empreza sira implementa projetu ne’e tuir BoQ ka la’e? Se la tuir, ami halo rekomendasaun ba empreza atu halo tuir”, Carlito dos Reis dehan iha AMC, ohin.
Nia salienta, durante halo monitorizasaun, tékniku sira hasoru difikuldade tanba laiha transporte no empreza konstrutora ba projetu ualu ladún koopera di’ak ho enjeñeiru, tanba empreza la kumpre rekomendasaun sira.
Verba ba implementasaun projetu ualu hamutuk millaun $1,3, husi montante ne’e kontrata ona empreza sira millaun $1,2, ne’ebé halo ona pagamentu $309.412,55.
Empreza ualu ne’ebé implementa projetu mak Savi Guju halo konstrusaun muru haleu edifísiu Obra Públika ho nia kustu kontratu $72.600, Mandarin halo konstrusaun ba salaun enkontru postu administrativu Fohorem ho kustu kontratu $116.397,52, Feto Lima harii eskola bázika filiál iha suku Matai, postu Maucatar ho nia verba kontratu $76.921,36, no Tofranditar harii Laboratóriu Sentru Saúde Komunitáriu Zumalai ho nia kustu kontratu $86.121,61.
Aleinde ne’e, empreza Queenzha Falov harii merkadu iha postu Suai ho kontratu $120.118,70, Bend Maha Male konstrui rezidénsia ba médiku iha suku Holpilat ho kontratu $413.144,25, Jino Linda harii kanál irrigasaun Bauraikun, iha aldeia Kulu-oan, Suku Tashilin ho kustu kontratu $167.420,90, ne’ebé konklui ona no Taroman Lakfa halo rekonstrusaun jardín iha foho Lakirin iha suku Holpilat ho kustu kontratu $140.219.
Iha Sorin seluk, Administradór Postu Fohorem, Delfim Amaral, konfirma katak prosesu konstrusaun salaun enkontru iha postu administrativu Fohorem tama ona iha faze taka zinku, nune’e projetu bele finaliza lalais.
“Ha’u observa katak prosesu tama ona faze hadi’a tetu, tan ne’e, Dezembru tinan ne’e bele finaliza ona konstrusaun tuir kontratu ne’ebe empreza sira asina”, nia espera.
Notísia relevante: Implementa ona projetu PDIM Ualu Iha Covalima
Jornalista: Celestina Teles
Editora: Maria Auxiliadora
