BOBONARO, 13 novembru 2024 (TATOLI) – Idozu no Ema ho Defisiénsia (EhD) hamutuk na’in-909 iha Postu Administrativu Atabae no Balibó foin asesu dukumentu Billete Identidade (BI) no Sertidaun Nasimentu (RDTL) ne’ebé fasilita husi Diresaun Konservatóriu Servisu Rejistu Notariadu, Munisípiu Bobonaro liuhusi programa rejistu movél.
Dokumentu importante ne’e Notariadu Bobonaro emite ba idozu no EhD husi Atabae na’in-509 kompostu husi Sertidaun Nasimentu RDTL 166 no BI 343, númeru ne’e rekolla husi suku haat; Atabae, Hataz, Rairobo no Aidabaleten.
Enkuantu postu administrativu Balibó na’in-400 kompostu husi BI 297 no Sertidaun Nasimentu 103, dadus ne’e rekolla husi suku Sanirin, Batugade, Cowa, Leo-Hutu, Balibó Villa, Leo-Lima.
Diretór Konservatóriu Rejistu Notariadu Munisípiu Bobonaro, Marciano Mali Loe, informa liuhusi programa rejistu movél ne’e maioria idozu no EhD asesu ona dokumentu importante hodi asesu subsídiu husi governu no seluk tan.
Idozu no EhD hirak ne’e foin asesu dukumentu tanba kestaun distánsia no kondisaun fíziku ho saúde la permite atu mai trata dokumentu iha edifísiu Notariadu Munisípiu Bobonaro.
Notisía relevante:Notariadu Bobonaro sei atende komunidade trata BI-Sertidaun RDTL iha suku
“Ami ba iha ne’ebá, ita-nia defisiente no idozu balun kondisaun ladi’ak, la’o araska liu, xefe suku sira organiza katak di’akliu eskipa sira tún ba direita, ne’ebé ami ba sira sente agradese, maske ami ho kondisaun ladi’ak, la asesu dokumentu ba iha kapitál munisípiu, maibé ekipa rejistu movél bele fasilita ami asesu dokumentu sira-ne’e, nune’e hafasíl sira atu trata kartaun eleitorál, banku no trata dukumentu iha sosiál,” Diretór Marciano informa ba TATOLI, iha kna’ar fatin, segunda ne’e.
Nia dehan, tuir planu programa sei realiza fali tinan oin ba postu administrativu sira seluk hanesan Cailaco, Bobonaro, Lolotoe no postu administrativu Maliana, liuliu suku ne’e dook husi vlla.
Programa ne’e fó liu prioridade ba idozu no EhD, enkuantu ba atendimentu jerál kontinua sentraliza iha edifísiu kapitál Maliana.
“Prepara hela sertidaun batizmu kópia ho orijinál no eleitorál kópia, ba sira-ne’ebé seidauk iha BI prepara dukumentu Sertidaun Nasimentu kópia ho orijinál no eleitorál, kona-ba atendimentu jerál iha baze ami sei hein programa husi nasionál,” nia hateten.
Notisía relevante: Komunidade kestiona Notariadu Bobonaro kona-bá sistema atendimentu BI no Sertidaun RDTL
Jornalista: Sérgio da Cruz
Editór: Evaristo Soares Martins
