DILI, 14 novembru 2024 (TATOLI)—Prezidente Instituto Nacional de Formação de Docentes e Profissionais da Educação de Timor-Leste (INFORDEPE), Domingos Martins, hamutuk ho dirijente sira husi Ministériu Edukasaun (ME) asina programa kooperasaun serbisu ho Reitór Instituto Católico para Formasaun de Professores (ICFP), Paul Gilchrist, hodi fasilita formasaun ba manorin 400 iha munisípiu haat.
Prezidente INFORDEPE, Domingos Martins, hateten, termu kontratu ba programa kooperasaun ne’e hanesan pasu preparatóriu fundamentál ida ba manorin bolsa kandidatu sira hodi fortalese no kontribui ba edukasaun ho profisionál.
“Kursu formasaun ida-ne’e prepara ba manorin bolsa kandidatu ne’ebé integradu iha karreira dosente ho objetivu atu opta kompeténsia obrigatória relasiona ho kurríkulu no instrumentu sira ba hanorin no prátika ba jestaun eskolár,” Domingos Martins, hato’o iha salaun konferénsia imprensa INFORDEPE, Balide, kinta ne’e.
Notísia relevante : INFORDEPE hasa’e koñesimentu manorin sira kona-ba literasia no numerasia
Iha fatin hanesan, Reitór ICFP, Paul Gilchrist, sente kontente bele serbisu hamutuk ho INFORDEPE iha projetu ne’e.
“Hau orgullu tebes ba serbisu hamutuk ho INFORDEPE iha projetu ida-ne’e. Governu husu atu esklui violénsia iha aula aprendizajen laran. Tanba ne’e, ami hakarak manorin sira apreende jestaun hahalok estratejia ne’ebe fó ba labarik sira no hadook husi violénsia. Ami garantia formasaun ida-ne’e hanesan esperiénsia di’ak ida ba manorin foun sira,” nia akresenta.
Kursu formasaun ba manorin bolsa kandidatu ne’e sei hahú uluk iha munisípiu neen hanesan Baucau, Bobonaro, Covalima, Dili, Lautém no Liquiçá.
Nune’e, manorin 400 sei partisipa formasaun ne’e, ne’ebé sei fahe ba faze rua, dahuluk manorin na’in-213 ne’ebé sei hahú formasaun husi loron 08 to’o 14 dezembru 024 no daruak ho manorin na’in-187 ne’ebé sei hahú formasaun iha loron 15 to’o 21 dezembru 2024. Kada faze realiza durante loron-lima .
Formasaun ne’e sei realiza iha aldeia Vila-Maria, suku Rairobo, postu administrativu Atabae, munisípiu Bobonaro.
Jornalista : Osória Marques
Editora : Julia Chatarina
