COVALIMA, 15 Novembru 2024 (TATOLI) – Servisu Munisipál Agrikultura (SMA) Covalima, liuhusi Departamentu Reprezentasaun Territoriál, Floresta no Planta Industriál prepara fini ai-oan rihun 15, iha postu Administrativu Suai , Munisípiu Covalima.
Diretór Servisu Munisipál Agrikultura Covalima, Lino Magno, dehan tékniku Floresta dezenvolve fini ai-oan liuhusi Programa Viveiru Komunitáriu Munisipál, nune’e iha tempu udan distribui ba to’os-na’in sira.
“Tékniku Floresta prepara fini ai-oan ho intesaun atu distribui ba komunidade no ami mós sei identifika hela fatin, nune’e iha tempu udan ita bele kuda ai-oan, tanba Floresta distribui fini depende ba komunidade submete sira-nia proposta”, Lino Magno dehan iha Tabakolot, ohin.
Diretór ne’e salienta katak programa ne’e prepara fini hamutuk kantreiru neen ho tipu ai oioin.
Tékniku Floresta Covalima, António Barros, reforsa katak tékniku sira dezenvolve ai espésie neen no bainhira komunidade submete pedidu maka Floresta hein de’it distribui ba sira. “Ami mós identifika fatin atu kuda ai-oan bainhira iha tempu udan”, salienta.
Tipu ai sira ne’e mak Kakeu rihun 2, Mahoni rihun 12, Saria 500, Teka 100, Sonoklin 300 no Tanzeriña 100.
Kritéria atu distribui ai mak presiza submete pedidu hafoin tékniku Floresta sei observa agrikultór sira-nia to’os no sei sujere ba komunidade presiza atu halo lutu, nune’e bainhira kuda ai-oan bele fó rezultadu.
Notísia relevante: Floresta Covalima rekolla reseita $7.250
Jornalista: Celestina Teles
Editora: Maria Auxiliadora
