VIENTIANE, 25 novembru 2024 (TATOLI)— Jornalista nain tolu husi Timor-Leste hola parte iha ASEAN Media Forum ba dala-ualu ne’ebé halao iha sidade Vientiane, Republika Demokratika Popular (RDP) Laos hodi diskute konaba Planu Mestre ba Konektividade ou Master Plan on ASEAN Connectivity (MPAC) ba tinan 2025.
ASEAN Media Forum ou Fórum Mídia ASEAN nian hanesan eventu anuál ida ne’ebé sai hanesan plataforma ida ba diálogu no kolaborasaun entre profisionál sira mídia nian, polítiku sira, no líder opiniaun xave sira iha komunidade ASEAN (Asosiasaun Nasaun sira Sudeste Aziátiku nian) ho apoiu husi GIZ (Organizasaun Alemaña).
Fórum ida-ne’e hakarak hasa’e komprensaun no kooperasaun entre estadu no membru sira liuhosi diskute asuntu oioin ne’ebé pertinente ba rejiaun, inklui liberdade mídia, integrasaun rejionál, no dezenvolvimentu sosio-ekonómiku.
Ba tinan ida ne’e, Jornalista Timor-Leste rasik hetan mós konvite hodi partisipa iha ASEAN Media Forum iha loron 25 novembru 2024 iha Crown Plaza Hotel – Vientiane. Jornalista Timor-Leste nain tolu nee mak hanesan :
- Francisco da Costa Sony (Ajénsia TATOLI)
- Cidalia A. Fátima da Conceição (Ajénsia TATOLI)
- Vito Baptista Magalhães (Hatutan)
Bazeia ba tópiku ba Konetividade ASEAN 2025, iha sesaun dader kolia konaba – Realizasaun sira no Perspetiva sira ne’ebe modera husi Pichai Chuensuksawadi (ASEAN) ho nia panelista sira hanesan Lim Chze Cheen (Diretór Divizaun Konetividade ASEAN).
Iha mós Mirza Sadaqat Huda (Investigadór prinsipál, Programa Mudansa Klimátika iha Sudeste Aziátiku – ISEAS – Yusof Ishak Institute), Mark Gallagher (Embaixadór Uniaun Europeia nian ba RDP Laos) no Suriyan Vichitlekarn (Diretór Ezekutivu Institutu Mekong).
Lim Chze Cheen hateten konektividade mak area krusial tebes hodi apoiu iha investimentu, ekonomia no konekta ema ho ema hanesan mobilidade turismu nian. Nune’e iha planu mestre ba tinan 2025 sei foku ba objetivu lima mak hanesan Infrastutura Sustentavel, Inovasaun Digital, Logistíka, Regulatoriu ka regra sira no Mobilidade ema nian.
“Ida ne’e sei hamosu ita nia objetivu seluk ida mak ASEAN Smart City, no iha ne’e sei hamosu potensia oin-oin ba setor produtivu sira,” dehan Lim Chze Cheen, Diretór Divizaun Konetividade ASEAN, segunda ne’e.
Hakat ba sesaun loraik nian hamosu mos diskusaun konaba dékada haat husi Dezenvolvimentu Sub-Rejiaun Mekong ne’ebé modera husi Lee Yoong Yoong ho panelista sira hanesan Yong Chanthalangsy (Prezidente AICHR – ASEAN Intergovernmental Commission on Human Rights husi RDP Laos), Sineenat Sermcheep (Diretór Sentru Estudu ASEAN – Universidade Chulalongkorn, Tailándia).
Iha mós Shameer Khanal (Lider Área Kooperasaun ASEAN, GIZ) no Azhar Jaimurzina Ducrest (Xefe Seksaun Konetividade Transporte no Lojístika ESCAP – The Economic and Social Commission for Asia and the Pacific).
Forum loron ida ne’e hetan partisipasaun maximu husi Jornalista nasaun membru ASEAN nian hanesan Indonézia, Malázia, Singapura, Tailándia, Filipina, Brunei Darussalam, Vietname, Myanmar, Kamboja no RDP Laos rasik.
Atividade ne’e loke direta husi Phosy Keomanivong, Vise-Ministru Informasaun, Kultura no Turizmu RDP Laos, Nicole Stechmann, Reprezentante Embaixada Alemaña ba RDP Laos no Sekretáriu-Jerál ASEAN, Kao Kim Hourn (Mensajen husi Video).
Jornalista : Cidalia Fátima
Editor : Armandina Moniz
