BOBONARO, 27 novembru 2024 (TATOLI) – Relasiona ho komemorasaun loron Proklamasaun Independénsia 28 novembru ba da-49, Prezidente Repúblika, José Manuel Ramos Horta, kuarta ne’e kondekora medalla rekoñesimentu ba kombatente Libertasaun Nasionál na’in-78 iha munisípiu Bobonaro ne’ebé rejistadu iha 2003-2005.
Sekretáriu Rejiaun IV, José Agustino Sequeira ‘Somocho’, hateten kondekorasaun ne’e atribui atu rekoñese no valoriza kombatente ne’ebé durante ne’e kontribui luta ba ukun rasik-an.
Somocho haktuir, iha períodu rezisténsia Rejiaun IV laiha esperiénsia gerrilla naruk, maibé halo misaun boot hodi suporta rejiaun sira seluk.
“Ita-nia servisu ne’ebé ke la’ós ki’ik, servisu ida ke obra boot, tanba ita-nia rezisténsia ne’e ita mesak-mesak de’it, ida-ne’e mak estadu sura hodi fó rekoñesimentu, kondekorasun ne’e iha Maromak nia lian hateten buat ne’e Cesar nia fó ba Cesar, buat-ne’ebé Maromak nia fó ba Maromak, entaun buat-ne’ebe ha’u halo, ha’u halo, buat ne’ebé la halo,bha’u la halo, tanba rekoñesimentu ida hanesan orgullu ida,” nia hateten iha salaun Maria-Tapo.
Vise Prezidente Konsellu Kombatente Libertasaun Nasionál husi Munisípiu Bobonaro, Lúcio Dinis Marques ‘Onsar’, reforsa kondekorasaun ne’e signifika estadu sei la haluha kombatente sira-nia sakrifísiu.
“Sira-ne’ebé seidauk mós estadu sei iha hanoin atu kondekora sira, entaun ita tenke hamutuk neon ida de’it atu ba oin bele di’ak, tanba ita mak matadalan ba dezenvolvimentu nasaun nia, tanba uluk ita terus no mate ba rai ida-ne’e, agora ita mós tenke hamutuk halo di’ak liután,” nia akresenta.
Prezidente Autoridade munisípiu Bobonaro, Alexandrino Pires, agradese ba estadu tanba rekoñese ona dedikasuan kombatente sira ne’ebé kontribui iha situasaun difisíl.
“Kondekorasaun ne’e la’ós ita tuur estadu fó de’it ka prezidente dekreta de’it, maibé haree husi prosesu ne’ebé ke naruk iha pasadu, kondekorasaun ida-ne’e atu forti liután hodi tane-aas estadu, imi mak na’in ba estadu, imi mak forsa ne’ebé atu defende dezenvolvimentu estadu,” nia hateten.
Enkuantu kondekorasaun ne’e bazea ba artigu 60 alinea J dekretu lei numeru 7/2018, 28 de Marsu alteradu ho dekretu lei númeru 33/2024, 18 Outubru nu’udar estatutu orgániku Konsellu Kombatentes Libertasaun Nasionál.
Notísia relevante: Deputada Julie Laiskodat sente onradu simu kondekorasaun husi PR Horta
Jornalista: Sérgio da Cruz
Editór: Evaristo Soares Martins
