BOBONARO, 27 novembru 2024 (TATOLI) – Primeiru Ministru (PM), Kay Rala Xanana Gusmão, orienta Autoridade Munisípiu Bobonaro (AMB) atu proteje fatin ne’ebé komunidade bairru Nunura, aldeia Manu-Aman, suku Tapo-Memo, postu administrativu Maliana, identifika mosu Gás naturál iha tersa (26/11) ne’e.
Komunidade identifika Gás naturál ne’e bainhira halo hela perfurasaun bee-moos no solda hela kanu bee nian, derrepente ahi lakan sai husi rai-kuak liuhusi kanu-lolon.
Fatin ne’e proteje bazea ba orientasaun Primeiru Ministru, Kay Rala Xanana Gusmão, hodi fó biban ba ekipa tékniku Ministériu Petróleu no Rekursu Minerál no instituisaun relevante sira atu halo investigasaun sientífika no kolleta dadus atubele hatene informasaun klaru kona-ba gás, petróleu, rekursu minerál no rekursu sira seluk.
Notísia relevante: Kosta Súl sei sai sentru atividade iha setór petróleu no gás naturál
“Horisehik meodia ha’u hetan kontaktu husi komunidade sira fura bee ne’e, ha’u dezloka kedas ba fatin ne’ebé mosu Gás, ami ba tiha, kontaktu kedas ba institutuisaun ne’ebé iha kompeténsia konaba Gás, depois ita hotu hatene katak hetan kedas vizita husi Primeiru Ministru, Maun boot Xanana mai kedas fatin hodi orienta katak, fatin ne’e proteje tiha. Iha fatin rua, ida mak sira bor ne’e, ida fali iha fatin seluk parte sorin, mas sira uza pipa ki’ik oan bee ladún maka’as ida,” Prezidente Autoridade Munisípiu Bobonaro, Alexandrino Pires, ko’alia iha salaun Maria-Tapo, kuarta ne’e.
Nia dehan, daudaun ne’e ekipa tékniku husi instituisaun relevante sira dezloka ona ba terrenu.
Nia haktuir, durante vizita Xefe Governu hodi orienta Autoridade Munisípiu Bobonaro atu bandu komunidade labele halo tan perfurasaun bee-moos iha bairu Nunura, aldeia Manu-Aman tanba iha indikasaun Gás mosu iha fatin rua besik-malu.
“Meiu ne’ebé autoridade esforsu maka tenke ser kanaliza bee ida husi ponte rohan mai ona komunidade, atu nune’e sira labele fura, tanba ita hotu hatene katak Gás ne’e nakonu ho ahi, risku tebes ba komunidade, liuliu ba labarik sira besik tama Natál sira sunu fogete besik ahi bele han nakfera tiha, ne’e tuir ha’u-nia hanoin, tanba tau de’it Gás ahi lakan liu.”
Nia konvida Bobonaro oan sira ne’ebé servisu iha área espesialista ba rekursu minerál no Gás nia atu tau hamutuk ideia ho autoridade oinsá atu dezenvolve rikusoin iha rai laran.
“Ita agradese tebes, natureza, grasa Maromak nian no eroi sira hatudu rikusoin ida mai iha munisípiu Bobonaro, riskusoin ne’ebé bele eleva ita-nia ekonomia,” nia akresenta.
Notísia relevante: Aprezentasaun Bloku iha Simeira Mina no Gás Provadu TL iha Rekursu Naturál
Jornalista: Sérgio da Cruz
Editór: Evaristo Soares Martins
