BOBONARO, 04 dezembru 2024 (TATOLI) – Negosiante sira iha merkadu lokál Ilobole husu ba governu atu prepara uluk fatin hafoin muda ba halo atividade negósiu iha merkadu anteriór ne’ebé lokaliza iha área baliza entre suku Raifun ho suku Odomau, postu administrativu Maliana no suku Oe-leu, postu administrativu Bobonaro, munisípiu Bobonaro.
Antes ne’e Autoridade Munisípiu Bobonaro ezekuta orientasaun Sekretáriu Estadu Asuntu Toponímia no Organizasaun Urbana, Germano Santa Dias Brites, hodi fó ona notifikasaun ba negosiante sira katak iha loron 15 fulan ne’e tenke hamamuk fatin no muda fali ba iha merkadu anteriór tanba konsidera barraka no kioske ne’ebé negosiante sira harii okupa espasu públiku no sempre mosu engrafamentu iha loron feriadu liuliu loron finadu.
Negosiante modo husi aldeia Raifun Foho, suku Raifun, Elsa Soe Mau, deklara nia parte prontu koopera no kumpri desizaun governu, maibé presiza tetu didi’ak nune’e labele afeta ba rendimentu diaria tanba merkadu anteriór distánsia dook husi estrada.
Notisía relevante: Kondisaun estrada Galusapulu halo negosiante merkadu lokál Ili-Bole ladún hetan rendimentu
“Ami prontu muda ba kotuk, mas halo uluk ami-nia fatin ba ami fa’an agora, se la halo agora ami araska, tanba fatin ne’e seidauk di’ak, boot sira halo di’ak ba atu ami fa’an ne’e ho kontente oituan, tanba ida-ne’e ami povu sira nain berusaha halo de’it,” nia informa ba Jornalista TATOLI, iha terrenu, kuarta ne’e.
Iha fatin hanesan, negosiante husi suku Oe-leu, Adelita de Jesus, afirma bainhira governu la prepara uluk fatin, nia sei la koopera, tanba rai iha parte merkadu kotuk ladún seguru atu harii kioske.
“Agora ami dook husi merkadu ne’e atu hetan osan laiha ona, tempu rai udan tan, ami nia fatin di’ak tiha, agora ami muda tun ba rai-naruk tan, depois mota-boot tan, ema sé mak atu tun ba, ema hola la di’ak ona, ami povu hetan osan iha merkadu oan ida-ne’e de’it,” nia dehan.
Alende ne’e husu mos ba governu fó oituan tempu tanba loron 15 dezembru ne’e tempu badak liu atu harii fatin negósiu.
“Labele, ami-nia fatin mak ne’e, rai udan tan ne’e ami atu ba ne’ebé, ami-nia fatin mak iha Ili-Bole oan ne’e de’it,” nia hateten.
Biban ne’e, negosiante Santina Leu, argumenta, desizaun governu ne’e sei afeta ba sira hetan rendimentu menus, tanba merkadu ne’ebé eziste dook husi kompradór nia matan no difisíl atu halo komunikasaun ba malu.
“Uluk ami fa’an iha merkadu laran, mas ema la hola ida, ami barak tur iha merkadu laran ne’e hare malu to’o ibun-tutun maran de’it, konforme lais, ida ne’ebé tur bilaan ne’e ninia ema la hola,” nia akresenta.
Tuir dadus negosiante ne’ebé halo atividade iha merkadu lokal Ilobe 20-resin, ne’ebé mai husi suku Oe-leu, Raifun no suku Odomau.
Enkuantu merkadu lokál Ilobe konstrui iha tinan 2007 ne’ebé kompleta ho fasilidade sanitária, maibé daudaun ne’e abandona hela.
Notísia relevante: Xefe Suku Oe-leu husu Governu konstrui merkadu lokál Ilibole
Jornalista: Sérgio da Cruz
Editór: Evaristo Soares Martins
