COVALIMA, 06 Dezembru 2024 (TATOLI) – Ministériu Administrasaun Estatál (MAE) distribui ona, iha Novembru, motorizada ba xefe suku no sekretáriu suku sira iha Covalima, maibé xefe suku Fohorem no Laktos husi postu administrativu Fohorem lakohi simu, tanba kondisaun motór ladi’ak.
Diretora Servisu Munisipál Apoiu Organizasaun Naun-Governamentál no Organizasaun Komunitária, Maria de Jesus Perreira, informa katak líder lokál na’in-rua ne’e la simu motorizada, tanba empreza ne’ebé manán konkursu públiku sosa fali motór marka Verza unidade rua ho kondisaun aat.
“Sekretáriu Munisipál Asuntu Sosiál no Organizasaun kontaktu ona ha’u atu informa sobre karta ne’ebé submete ba diretór-jerál [MAE] no hatún ona despaxu, nune’e Governu seidauk bele halo pagamentu ba empreza ho razaun empreza presiza haree fali motorizada marka Verza rua nia kondisaun aat ne’e”, Maria Perreira dehan, ohin.
Dirijente ne’e salienta katak prosesu hotu hala’o iha nasionál no munisípiu hein simu de’it, maibé iha momentu distribuisaun mak identifika fali motorizada rua mak nia kondisaun la di’ak, nune’e xefe suku na’in-rua labele simu.
Ho problema ne’e, diretora Maria Perreira halo koordenasaun ho MAE oinsá mak bele solusiona kestaun motorizada rua ne’e.
“Ita hakarak distribui motorizada ne’ebé di’ak ba xefe suku sira, nune’e fasilita sira atu hala’o serbisu. Tuir loloos empreza mak haree molok atu distribui, maibé foin lalais halo distribuisaun motorizada ne’e empreza la marak prezensa, tékniku sira mak iha”, nia relata.
Motorizada ne’e hamutuk unidade 60, kompostu husi marka Verza 29 (rua aat) no Mio Beat ida ba xefe suku sira no Honda Revo 30 ba sekretáriu suku sira.
Xefe Suku Fohorem, Júlio Ferreira Alves, rekoñese seidauk simu motorizada tanba haree kondisaun motór ladi’ak.
“Ami la simu motorizada tanba kondisaun la di’ak, loke kontak mós la lakan, tebe la moris. Di’ak liu lalika simu, husik entrega fali ba empreza, nune’e sira bele buka solusaun”, dehan.
Lembra katak empreza ne’ebé manán konkursu públiku husi MAE mak Bandido Qualidade hodi halo akizisaun ba motorizade 904 hodi fahe ba suku sira iha territória, nune’e bele hala’o serbisu ho efisiénsia no efikásia. Motorizada sira-ne’e hola ho tipu tolu mak marka Verza ba xefe suku sira hamutuk 447, Mio Beat lima ba xefe suku feto sira no Honda Revo hamutuk 452.
Notísia relevante: MAE prepara motorizada rua ba kada suku iha territóriu
Jornalista: Celestina Teles
Editora: Maria Auxiliadora
