BOBONARO, 10 dezembru 2024 (TATOLI) — Governu lokál liuhusi Autoridade Munisipál Bobonaro, seidauk deside data fisku atu muda negosiante sira iha merkadu lokál Ilibole ba merkadu anterior ne’ebé governu estabelese iha parte kotuk, tanba seidauk prepara fatin ne’ebé di’ak.
Merkadu lokál ne’e lokaliza iha área baliza entre suku Raifun, Odomau, postu administrativu Maliana no suku Oe-leu, postu administrativu Bobonaro.
Diretór Servisu Munisipál Jestaun Merkadu Autoridade Munisípiu Bobonaro, Paulo dos Santos, esklarese foin lalais ne’e ekipa sira tun duni ba terrenu halo divulgasaun lei utilizasaun merkadu no utilizasaun estrada, la’os atu obriga negosiante sira muda kioke no barraka ba kotuk iha loron 15 fulan ne’e.
Notisia relevante: Governu tenke prepara uluk fatin hafoin muda negosiante Ilibole ba kotuk
“Ita la ba obriga komunidade ho tempu urjente ida hanesan, tanba seidauk iha kondisaun, maibé ami sei ba fila-fali la’os dehan ba hanesan fiksu ona lae, ami sei ba rekolla imput husi sira atubele koloka sira iha fatin ne’ebé labele fó vitima ba negosiante sira,” nia informa ba TATOLI, iha kna’ar fatin, segunda ne’e.
Eis administradór postu administrativu Balibo ne’e apela ba negosiante sira atu koopera bainhira governu lokál deside atu muda, tanba atividade negosiu iha merkadu Ilibole ne’e okupa espasu públiku.
“Muda tan ba kotuk de’it, nune’e fó nia espasu ne’e ba karreta ho motor, labele fó risku ba komunidade sira ne’ebé halo movimentu ba mai,” nia tenik.
Negosiante merkadu Ilibole, Adelita de Jesus, sente kontenti tanba governu seidauk hola desizaun iha tempu badak.
“Hau sente tinan oin sira-ne’e bele, tanba agora tempu udan hanesan ne’e mak muda ami ida hela kedas iha ne’e atu ba ne’ebé, sasan sira ne’e atu tau iha ne’ebé, se ita-nia boot sira hanoin halo netik fatin ruma mai ami,” nia dehan.
Enkuantu negosiante sira ne’ebé daudaun ne’e halo atividade negosiu iha merkadu lokál ne’e kuaze 20-resin mai husi suku Raifun no Odomau, postu administrativu Maliana no suku Oe-eleu, postu administrativu Bobonaro.
Notísia relevante: Governu presiza tau matan ba mini merkadu Ilibole
Jornalista: Sergio da Cruz
Editór: Evaristo Soares Martins
