PAM Bobonaro “Ha’u-nia mandatu hakarak valoriza no promove kultura”
BOBONARO, 13 dezembru 2024 (TATOLI) – Prezidente Autoridade Munisípiu Bobonaro, Alexandrino Pires, hateten durante nia mandatu sei inklui lia-na’in sira iha kualkér serimónia nasionál estadu nia ne’ebé realiza iha nível postu no munisípiu ho intensaun atu valoriza no promove kultura orijinál Maubere no Buibere nia.
Notísia relevante: Postu Bobonaro selebra 28 Novembru ho kompetisaun futeból-kultura
“Ha’u hakarak reprezenta lia-na’in ida tuur iha fatin Verry Important Person (VIP) tantu mane no feto, tanba ita mai husi ita-nia kultura, demokrasia ne’e demokrasia kultura nia, ita relijiaun Katólika mós kultura nia, tanba domingu ita ba misa amu sira fó bensa depois ba uma to’o uma-lisan nia, katuas sira hú tan. Ida-ne’e mak ha’u hakarak, durante ha’u-nia mandatu ha’u hakarak valoriza ida-ne’e, ida-ne’e importante,” nia hateten iha salaun Maria-Tapo, sesta ne’e.
Nia dehan, iha serimónia importante sira tuir mai sei loke kompetisaun kultura, atu lia-na’in, ferik ho katuas sira bele aprezenta kultura tebe, bidu no baku-likurai tanba ikus-ikus ne’e ema balu inventa ona obra ne’ebé bei-ala sira husik hela.
Pires argumenta, razaun fó prioridade ba kultura tanba kultura mak identidade timoroan nia ne’ebé bei-ala sira husik hela to’o ohin loron jerasaun foun sei kontinua banati.
“Ita la promove ita-nia kultura, ne’e ita mak halo invazaun ba ita-nia indentidade rasik, iha serimónia boot sira ha’u lakohi kultura sira inventa tún inventa sa’e ne’e, ha’u hakarak loos mak aprezenta ida orijinál loos ne’e, atu nune’e ita bele promove no valoriza nafatin ita-nia identidade husi ne’ebé, ema dehan Maubere mak ida-ne’e duni,” nia dehan.
Enkuantu foin lalais iha serimónia nasionál Loron Proklamasaun Independénsia 28 novembru ba da-49 autoridade munisípiu Bobonaro ho komisaun Organizadora realiza programa kultura tebe, bidu no baku-likurai ho intensaun atu valoriza no promove nafatin identidade timoroan nia ne’e labele lakon jerasaun ba jerasaun.
Notísia relevante: Turista Alemaña apresia Festivál Kulturál Rabilau
Jornalista: Sérgio da Cruz
Editór: Evaristo Soares Martins
