DILI, 21 dezembru 2024 (TATOLI) – Papa Francisco hato’o nia mensajen gratidaun ba Governu no igreja Timor-Leste ne’ebé halo selebrasaun misa agradesimentu ba atividade preparasaun vizita Estadu no pastorál papál iha Timor-Leste entre loron 09 no 11 Setembru 2024.
“Ha’u simu informasaun kona-ba selebrasaun eukaristia ne’ebé hala’o iha loron 21 hodi taka ofisialmente atividade importante sira ba vizita apostólika nian iha Timor-Leste. Santu Padre hato’o husi nia fuan laran ba fiar na’in hotu ne’ebé partisipa iha biban agradesimentu ba grasa espirituál hotu be sura la nahas ne’ebé simu ona viajen apostólika liubá”, reprezentante Vatikanu iha Timor-Leste Monseñór Marco Sprizzi lee sai karta Papa nian iha misa agradesimentu iha igreja Katedrál, Dili.
Iha karta ne’e Papa hato’o katak ho memória ne’ebé sei moris hela kona-ba manisfestasaun fiar no devosaun estraordinária husi populasaun lokál no fervór apostólika ne’ebé hatudu ona durante loron vizita nian nu’udar sinál domin no komuñaun ho ministériu Saun Pedro nian, nune’e mós sinál fiar katólika nian ne’ebé abut kle’an ona iha rai ne’e.
Papa Francisco hakarak hamutuk iha biban asaun grasa ne’e no povu Timór ne’ebé kbiit-na’in no aten-barani ho hakarak atu evanjellu haroman nafatin fatin hotu-hotu sosiedade nian hodi kontribui ba hametin unidade no justisa, liuliu foinsa’e sira.
“Sua Santidade hakarak hato’o nia hakarak atu Kristu nia mina-morin ka perfume kmanek kontinua halekar ba ema hotu ne’ebé hafalun ho ai-kameli nia morin ne’ebé sai karakterístika nasaun ida ne’e nian no atu konfirma lia-menon ksolok ida ne’e”, monseñór hateten.
Nia dehan Santu Padre haraik ninia bensaun apostólika ba autoridade sivíl no relijiozu sira nomós ba ema hotu ne’ebé prezente no Papa Francisco husu favór atu labele haluha reza ba nia.
Iha fatin hanesan, Arsebispu Arkidioseze Metropolitana Dili, Dom Virgílio Kardeál do Carmo da Silva, reforsa katak selebrasaun misa agradesimentu ba atividade apostólika Papa nian husu mós ba sarani sira atu reza ba Papa.
“Amu Papa iha nia mensajen iha karta ne’e husu ita atu reza ba nia. Nia mós foin selebra iha semana kotuk tinan 55 presbitériu. Iha misa agradesimentu ne’e mós reza ba nia”, kardeál hato’o.
Dom Virgílio realsa katak Papa husu iha nia karta atu sarani sira sai mina-morin ai-kameli nian ba ema seluk.
“Amu Papa nia bensaun no mensajen atu ita hotu sai hanesan ai-kameli nia morin atu atrai ema nia atensaun. Hanorin ema seluk ho ita-nia hahalok”, konklui.
Notísia relevante: Papa husu sarani katólika TL kontinua hametin fiar hanesan Ai-Kameli nia morin
Jornaslista: Jesuína Xavier
Editora: Maria Auxiliadora
