BOBONARO, 30 dezembru 2024 (TATOLI)-Estrada iha área Zulo-il liga husi suku Lontas ba postu administrativu Loloto’e, Munisípiu Bobonaro kontinua hetan estragus husi dezastre naturál hafoin akontese udan-bo’ot foin lalais ne’e.
Administradór postu administrativu Loloto’e, Munisípiu Bobonaro, Sebastião Amaral, konfirma, kondisaun atuál difikulta tebes movimentasaun públiku husi diresaun kapitál Maliana ba Loloto’e vila,tanba durante loron rua ona karreta labele asesu ba mai.
Notísia relevante:Movimentasaun karreta-motorizada iha estrada Zulo-il Lolotoe paradu
“Estrada tuan ne’e la uza totál,tanba bronjong sira ne’e tuun hotu. Estrada foun ida foin IGEADI foin loke ne’e mós monu hela deit motor nia fatin,ohin dadeer ha’u ho xefe suku na’in tolu ami tuun mai, mas motor dudu de’it mak tuun mai, karreta agora paradu, sai de’it mós la di’ak, tama de’it mós la di’ak” nia informa ba Jornalista Tatoli, iha edifísiu Autoridade Munisípiu Bobonaro,segunda ne’e
Líder másimu Autoridade Postu Administrativu Loloto’e ne’e triste no preukupa tanba kondisaun estrada atuál la permite Karreta Ambulansia atu transporta emerjénsia pasiente ho kazu grave ba ospitál Referál Maliana.
Nia subliña, kestaun ne’e hato’o ona ba Prezidente Autoridade Munisipál Bobonaro atu koordena ho Institutu Jestaun Ekipamentu Apoia Dezembolvimentu Infraestrutura, Institutu Públiku (IGEADI,IP) Brigada Maria-Tapo hodi halo intervensaun urjente atu fasilita movimentu komunidade iha tempu udan.
“Ida-ne’e presiza alat berat (Ekipamentu pezadu), se ema halo ho liman labele, anaunser Estrada ida foin dudu ne’e komunidade bele halo ho liman,maibé karreta labele liu só motór de’it mak bele liu,” Sebastião afirma.
Alende ne’e, Komunidade Loloto’e, Antonio Feliciano Moniz, rekomenda ba Ministériu Obras Públika atu tau-atensaun urjente, tanba daudaun ne’e difísil atu asesu mós ba dalan alternativu seluk.
“Karreta atu tama ba Loloto’e ne’e só husi Suai Maukola, Holbolu sa’e ba mais udan hansan arraska, dalan seluk laiha husi Bobonaro mak bele maibé mota-bo’ot rua, mota Laku ho Pazól ne’e labele” nia tenik
Tuir Moniz Governu presiza halo estudu klean,tanba Estrada ne’e tinan-tinan siempre hetan estragus husi desastre naturál.
“Ami-nia Estrada ne’e estragus ne’e kuaze dala haat ou lima hanesan ona karik, se la sala tinan rua ba kotuk hadi’a tiha, maibé udan mai nakfera hotu fali,iha fulan hirak ba kotuk ne’e mós aat fali, IGEADI mai normaliza tiha, agora udan boot semana ida ne’e,kondisaun estrada ne’e grave liután, se bele governu buka meius oinsá para Estrada ne’e labele sai trajetu ba dezastre naturál,” sidadaun ne’e hateten.
Enkuantu komunidade ne’ebé labele asesu ba kapitál Munisípiu mai husi suku haat hansan,Opa, Deu-det, Lupál no Guda,ezetu suku tolu seluk hanesan Lontas,Gildapíl no Lebos.
Postu administrativu Loloto’e iha aldeia 20,suku hitu ho totál Populasaun 7,695 no xefe família 1,651 ne’ebé rejista iha dadus monografía Autoridade Munisípiu Bobonaro tinan-2022.
Notisia relevante:PAM Bobonaro nota presiza intervensaun urjénsia ba estrada Zulo-il Lolotoe
Jornalista: Sergio da Cruz
Editór: Rafael Ximenes de A. Belo
