DILI, 07 janeiru 2025 (TATOLI)—Dekanu Fakuldade Edukasaun Institutu Superiór Cristal (ISC), Zélio da Conceição Freitas, sujere ba Governu liuhusi Ministériu Edukasaun (ME) atu oferese formasaun ba estudante sira.
“Setór edukasaun iha rai-laran la’o di’ak maibé presiza komponente hotu atu serbisu hamutuk hodi hadi’a kualidade edukasaun, tanba presiza mós iha formasaun ne’ebé la’ós ba de’it profesór sira maibé presiza mós formasaun karakter ba estudante sira atu oinsá mak rua ne’e serbisu hamutuk hodi mellora di’ak liután edukasaun iha Timor-leste atu nune’e tinan-lima mai tan karik bele la’o di’ak,” Akademista hateten ba Agência Tatoli, iha ninia knaar fatin, Balide, tersa ne’e.
Notísia relevante : Sentru Formasaun M3 fó formasaun mekánika ba joven sira
Nia nota, profesór sira daudaun ne’e enfrenta problema lian, ho nune’e profesór sira presiza tuir formasaun pedagojia no formasaun lian portugés tanba liuhusi meiu ida-ne’e bele uza lian ne’e hodi hatutan siénsia no teknolojia sira.
“Governu presiza aselera ba parte pedagojia nia no formasaun lian portugés tanba ita haree iha eskola ensinu pre-primária 3 siklu, sekundáriu no ensinu superiór sira presiza tebes formasaun di’ak liután para edukasaun iha Timor-Leste ho kualidade di’ak. Formasaun ba lian ortugés ne’e tanba lian ofisiál, entaun ita tenke utiliza,” nia akresenta.
Akademista fó hanoin ba graduadu sira atu uza abilidade no koñesimentu ne’ebé mak durante ne’e hetan iha universidade atu transforma iha sosiedade nia laran.
“Ba graduadu sira se bele siénsia sira ne’e tutan nafatin tanba daudaun problema mak ita-nia dezempregu barak, fatin ba serbisu mak limitadu tebes. Tanba ne’e, Governu tenke haree asuntu ne’e tanba ami universidade privada no nasionál prodús ona ema barak maibé kampu traballu mínimu tebes. Graduadu sira mós labele dependénsia de’it ba Governu maibé sira rasik kria kampu serbisu ba sira-nia an rasik atu oinsá hetan osan no fó fali serbisu ba nia maluk sira seluk,” nia tenik.
Dekanu ne’e konsidera, presiza peskiza no mapamentu ba nesesidade rekrutamentu profesór.
“Ministériu la halo mapamentu, dezempregu aumenta no ita la lori ema sira ne’e ba hetan serbisu. Tanba daudaun ne’e presiza profesór barak,” nia katak.
Jornalista : Osória Marques
Editora : Julia Chatarina