DILI, 07 janeiru 2025 (TATOLI)—Servisu Edukasaun Munisípiu Dili daudaun ne’e halo hela negosiasaun ho okupante arredór eskola iha Dili atu hamamuk fatin nune’e prosesu ensinu aprendizajen bele la’o ho di’ak.
“Ita iha hela faze negosiasaun tanba husi Ministériu Edukasaun la prevee osan atu bainhira muda sai komunidade tenke hetan buat ruma, tanba sira mai hela iha arredór eskola ne’e mós ho sira-nia inisiativa rasik, maibé bainhira sira fila husu buat oin-oin, ne’ebé ita la garante ida-ne’e,” Diretór Servisu Edukasaun Munisípiu Dili, Sabino da Costa Pereira, hateten, iha ninia knaar fatin, Comoro, tersa ne’e.
Notísia relevante : ME husu komunidade okupa arredór eskola prepara-aan hamamuk fatin
Dirijente ne’e dehan, okupante sira hela ona durante tempu naruk no la halo arrendamentu ba Estadu.
“Ida-ne’e prejudika tebes ita-nia oan sira-nia prosesu aprendizajen iha aula laran,” nia akresenta.
Iha sorin seluk, Inspetora Jerál ME, Maria Manuela Gusmão, hateten, komunidade ne’ebé okupa arredór eskola ne’e la fó liberdade ba eskola atu hala’o atividade ruma.
Tuir Inspetora, estabelesimentu ensinu presiza espasu hodi harii instalasaun suporta ensinu aprendizajen.
“Buat ida-ne’e problema boot ida, akontese tanba rai ne’e husik mamuk no morru laiha entaun ema mai hela, ita atu hasai sira maibé sira husu ida-ne’e, ida ne’ebá. Entaun ida-ne’e la fó liberdade ba eskola sira atu halo kampu ruma hodi hala’o nia atividade ba,” nia tenik.
Maria Manuela Gusmão, salienta, ME fasil atu halo aprosimasaun ho Komunidade ne’ebé okupa arredór eskola tanba nu’udar rai Estadu “maibé problema agora sé mak atu fó indemnizasaun ba sira.”
ME rejista dadaun ne’e uma-kain hamutuk 72 okupa hela arredór eskola iha munisípiu Dili, ne’ebé husi totál ne’e, uma-kaim 52 hela iha arredór eskola ensinu báziku ho nia filiál sira, restante okupa iha eskola ensinu sekundáriu jerál no tékniku vokasionál.
Komunidade okupa Eskola Báziku Sérgio Vieira de Mello, 10 Dezembru, Ensinu Báziku Filiál nú.5 Comoro, Ensinu Báziku Sentrál (EBC, sigla portugés) 30 de Agustu, Eskola Ensinu Sekundáriu Jerál 04 Setembru UNAMET Balide, Eskola EBC Bidau Akadiru-hun, Eskola Sekundária Tékniku Vokasional Industria no Teknolojia Becora no eskola sira seluk tan.
Jornalista : Osória Marques
Editora : Julia Chatarina
