DILI, 08 janeiru 2025 (TATOLI)– Sekretáriu Jerál Federasaun Karate-do Timor-Leste (FKTL), António Carlos de Araujo, informa, daudaun prepara ona atleta na’in-haat hodi kompete iha jogu Komunidade Ko’alia Lian Portugés (CPLP-sigla portugés) ne’ebé sei akontese iha Jullu tinan ne’e.
“Karate-do ita prepara ona atleta na’in haat hodi kompete iha jogu CPLP nian, ita laiha problema, prontu atu kompete iha jogu ne’e,” António hateten ba Agência TATOLI iha Jinaziu Dili, kuarta ne’e.
Notisia relevante:Governu halo ona preparasaun másimu hodi realiza jogu CPLP
Atleta ne’ebé prepara ona ho idade menus husi 17, husi númeru ne’e atleta feto rua no mane rua.
“Ita nia atleta haat ne’e feto rua mane rua, feto ida joga iha klase kilograma 48, ida iha kilograma 53 no mane iha kilograma 55 no kilograma 60. Sira nia preparasaun hahú kedan iha tinan kotuk, ho nune’e ita fiar sira sei hatudu rezultadu di’ak,” nia tenik.
Jogu CPLP tinan ida ne’e sei hetan partisipasaun másimu husi Estadu-membru sira, ho delegasaun hanesan, Angola (partisipante 101), Brazil (101), Cabo Verde (101), Guiné-Bissau (61), Guiné Ekuatoriál (35), Mosambike ( 70), Portugál (101), São Tomé e Prínsipe (35), no Timor-Leste (101).
Eventu importante ida-ne’e hatudu Timor-Leste nia kompromisu atu haburas interkámbiu kulturál no atlétiku iha komunidade CPLP nia laran.
Notisia relevante:Atletizmu sei halo selesaun ba atleta na’in-ualu hodi kompete iha jogu CPLP
Jornalista: Hortencio Sanchez
Editór: Florencio Miranda Ximenes