iklan

NASIONÁL, HEADLINE

SEKOMS husu Prezidente foun Agência TATOLI, I.P reforsa instituisaun sai fornesedór informasaun

SEKOMS husu Prezidente foun Agência TATOLI, I.P reforsa instituisaun sai fornesedór informasaun

Sekretáriu Estadu Komunikasaun Sosiál, Expedito Loro Dias Ximenes, fó pose ba Prezidente Konsellu Diretivu Agência TATOLI, I.P, Noémio Mateus Soares Falcão, iha salaun PCM, Palásiu Governu, kinta (10/01/2025). Imajen Tatoli/Francisco Sony

DILI, 10 janeiru 2025 (TATOLI)–Sekretáriu Estadu Komunikasaun Sosiál (SEKOMS), Expedito Loro Dias Ximenes, sesta ne’e, fó pose ba Prezidente foun Konsellu Diretivu Agência Noticiosa de Timor-Leste-TATOLI, Institutu Públiku (Agência TATOLI, I.P), Noémio Mateus Soares Falcão, ba mandatu tinan-haat.

Sekretáriu Estadu husu ba Prezidente emposadu atu reforsa mídia estatál ne’e sai fornesedór informasaun ba mídia seluk no sai clearing house.

Sekretáriu Estadu Komunikasaun Sosiál, Expedito Loro Dias Ximenes. Imajen Tatoli/Francisco Sony

“Ita akompaña, ida mak TATOLI seidauk hala’o mak sai clearing house. Tanba sá mak naran Agência Noticiosa, signifika katak nia la hanesan ho mídia seluk. Durante ne’e TATOLI sente-an hanesan mídia sira seluk, loloos sente hanesan mídia Estadu ne’ebé fornese informasaun ba mídia sira seluk. Ida-ne’e seidauk halo, tenke sai fornesedór informasaun ba mídia iha nível nasionál, rejionál no internasionál,” Sekretáriu Estadu hato’o iha salaun Prezidénsia Konsellu Ministru, (PCM, sigla portugés), Palásiu Governu, sesta ne’e.

Governante ne’e dehan, loloos Agência TATOLI, I.P no Rádiu Televizaun Timor-Leste, Empreza Públika (RTTL, E.P) bainhira iha atividade importante husi Estadu no Governu, tenke sai fontes informasaun la’ós halo kompetisaun ho mídia seluk.

“Ha’u hein katak ho Prezidente foun nia esperiénsia ne’ebé iha, TATOLI bele sai fornesedór ba mídia seluk. Clearing house katak bainhira informasaun sala, iha rejionál, nasionál no internasionál, TATOLI mak sai clearing house no hatán katak informasaun ne’e la loos no sala, ka loos mak ida hanesan-ne’e. Portantu, ha’u hein katak funsaun rua ne’e sai fornesedór notísia no clearing house ba mídia seluk, ne’e importante,” nia akresenta.

Notísia relevante : Governu nomea Noémio Falcão nu’udar Prezidente TATOLI,I.P

Nune’e, SEKOMS tau esperansa tomak ba Prezidente foun ho nia membru sira bele dezenvolve liután instituisaun durante mandatu no tenke leál ba Estadu no Governu.

“TATOLI hanesan Agência Noticiosa ne’ebé iha multi kanál, multi plataforma multi tarefa, no multi língua, sentru arkivu, sentru produsaun sinema, no dokumentasaun, ida-ne’e karakter ne’ebé iha. Purtantu nia funsionamentu tuir dekretu-lei ne’ebé harii TATOLI tenke sai sentru produsaun sinema no institutu opiniaun ba públiku, ida-ne’e nia funsaun prinsipál. Ida tan mak tenke tau-atensaun ba sentru formasaun no peskiza,” nia hameno.

Biban ne’e, governante ne’e rekoñese dedikasaun husi Prezidente Konsellu Diretivu sesante sira.

“TATOLI bainhira lideradu husi José da Costa, konsege no hahú lori naran TATOLI ba iha nasionál, rejiaun, munisípiu no internasionál. Depois mai iha lideransa Manuel Pinto, ne’ebé hasoru dezafiu no obstákulu barak maibé konsege lori TATOLI ba oin. Ha’u mós oportunidade ida-ne’e hakarak lori Governu nia naran, hato’o agradesimentu boot ba Manuel Pinto nia kontribuisaun durante tinan-haat nia-laran,” nia tenik.

Prezidente foun hakarak halo ezersísiu hatutan ba rezultadu sira

Prezidente foun Konsellu Diretivu Agência TATOLI, I.P, Noémio Mateus Soares Falcão, konsidera, simu knaar foun ne’e nu’udar onra, priviléjiu no oportunidade di’ak hodi hatutan serbisu sira husi Prezidente sesante sira.

Prezidente Konsellu Diretivu Agência TATOLI, I.P, Noémio Mateus Soares Falcão, hala’o juramentu iha ámbitu simu pose, iha salaun PCM, Palásiu Governu, kinta (10/01/2025). Imajen Tatoli/Francisco Sony

“Atan ha’u atubele dedika ha’u-nia esforsu tomak maibé importante liu, halo ezersísiu hodi soma ka hatutan tan ba rezultadu ne’ebé iha ona, hatutan tan serbisu tomak husi ha’u-nia kolega Prezidente sesante, irmaun Manuel Pinto, ne’ebé hala’o tiha ona. Ho nune’e, hakarak agradese mós ba ekipa tomak ne’ebé kontribui ona liuhusi sira-ninia dezempeñu hodi apoia Prezidente sesante durante ninia mandatu,” Prezidente katak.

Noémio Falcão konsidera, tempu mak sei hatán ba asaun sira “aktu di’ak eh la di’ak, só tempu maka sei bele fó resposta kona-ba serbisu, dezempeñu, planu no programa durante mandatu, no serbisu hamutuk ho parte relevante no pertinente.”

Notísia relevante : Governu nomea Manuel Pinto lidera Agência TATOLI

Nia komprometidu, durante tinan-haat nia laran, tenke trasa programa no agenda, klaru, ne’ebé foka ba objetivu prinsipál no presiza iha alvu klaru.

“Kaer metin ba objetivu estabelese Agência TATOLI, I.P sai fontes informasaun ofisiál Estadu Timor-Leste nian, tenke iha duni kapasidade no kbiit. Husi kedas embriaun to’o ohin loron no ba oin, tenke hatuur instituisaun Estadu ne’e ho nia karakter rasik, informasaun iha internasionál, eskala nasionál, rejionál no TATOLI tenke sai kuziña ba informasaun hotu Estadu nian, rápidu no rigór,” Prezidente Konsellu Diretivu Agência Tatoli, I.P, komprometidu.

Noémio Falcão agradese mós ba Sekretáriu Estadu ne’ebé depozita konfiansa ba nia no konfesa maski seidauk iha esperiénsia atu diriji serbisu instituisaun ho membru kuaze 70, maibé iha konfiansa totál ba apoiu no serbisu hamutuk.

“Klaru katak ha’u konta ho apoiu totál laiha rezerva husi Sekretáriu Estadu Komunikasaun Sosiál, ho kolega sira hotu iha SEKOMS nomós futuru Vise-Prezidente rua, ne’ebé ha’u seidauk bele temi naran iha biban ida-ne’e,” nia katak.

Prezidente Konsellu Diretivu Agência TATOLI, I.P, Noémio sei fó prioridade ba rekrutamentu, liu-liu ba jornalista destaku ba munisípiu ne’ebé mak seidauk iha hanesan Liquiçá, Lautém, Manatuto, Aileu, Ainaro, Manufahi.

Biografia

Noémio Mateus Soares Falcão, moris iha Maubisse, iha loron 17 juñu 1985, hahú nia karreira hanesan jornalista kontribuidór iha Magazine Voice of Labeh iha maiu 2009 to’o dezembru 2010 no iha tinan tuir mai kontinua atividade jornalizmu iha online Timor Expose no Jornál Nasionál Semanáriu.

Hahú setembru 2010 to’o dezembru 2011, Noémio Mateus Soares Falcão hala’o knaar hanesan Media Officer iha Ministériu Turizmu, Komérsiu no Indústria, no husi setembru 2013 to’o dezembru 2014, sai Koordenadór Mídia ba Projetu UNDP iha Kuartél Jerál PNTL, iha Caicoli.

Desde fevereiru 2012 to’o novembru 2014, Noémio sai hanesan Jestór ba Produsaun no iha tempu hanesan sai mós hanesan Editór iha mídia imprime Diário Timor Post. Iha janeiru 2015 to’o janeiru 2019 hetan promosaun sai Xefe Redasaun iha Timor Post.

Husi jullu 2023 to’o sai Prezidente foun Konsellu Diretivu Agência TATOLI, Noémio sai Asesór ba asuntu Mídia iha Sekretaria Estadu Komunikasaun Sosiál.

Noémio Mateus Soares Falcão daudaun ne’e nu’udar finalista iha Universidade Nasionál Timor-Lorosa’e (UNTL), iha fakuldade Siénsia Sosiál/Komunikasaun Sosiál.

Aleinde ne’e, Noémio frekuenta ona formasaun lubuk ida iha área mídia no komunikasaun iha LPDS, APJC, AJTL, JTC no seluk tan inklui partisipa konferénsia no estudu komparativu lubun iha área jornalizmu.

Kona-ba Agência TATOLI, I.P

Iha loron 07 marsu 2017, liuhusi reuniaun Konsellu Ministru aprova kriasaun Agência TATOLI, nu’udar kontinuasaun husi kriasaun portál notísia ida http://tatoli.tl, ne’ebé estabelese ho embriaun hanaran ANTIL, hafoin muda naran ba TATOLI.

Objetivu prinsipál husi Agência TATOLI maka sai fonte informasaun ofisiál, ho produsaun informasaun ba públiku ho eskala nasionál, rejionál no internasionál, ho karakter multikanál, multimédia, multiplataforma no multitarefa.

Iha futuru, Agência TATOLI bele dezenvolve no funsiona hanesan sentru produsaun sinema no dokumentasaun Estadu, institutu opiniaun públiku, hanesan fórum informasaun públika, sentru jestaun arkivu no dokumentasaun Estadu, no hanesan sentru formasaun no peskiza ne’ebé aplika ba komunikasaun.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!