iklan

NASIONÁL, HEADLINE

Deputada PD husu CLN halo jestaun di’ak ba produtu iha armazen nasionál

Deputada PD husu CLN halo jestaun di’ak ba produtu iha armazen nasionál

Foos iha armazen CLN, Bebora, kuarta (13/12/2023). Imajen Tatoli/Egas Cristóvão

DILI, 21 janeiru 2025 (TATOLI)–Deputada Bankada Governu husi Partidu Demokrátiku (PD), Maria Teresa Gusmão, husu ba Sentru Lojístika Nasionál (CLN, sigla portugés) atu halo jestaun di’ak ba produtu agíkola ne’ebé rai iha armazen nasionál, nune’e labele rai de’it to’o a’at.

“Hakarak foti kona-ba iha loron 17 janeiru ekipa AIFAESA no CLN hala’o destruisaun ba koto tonelada 92 no fore-rai tonelada 10, ho totál produtu hamutuk tonelada 102 hetan estragu. Husu ba CLN nia manajementu oinsá bele akontese produtu to’o tonelada boot sunu de’it iha lixeiru Liquiçá,” Deputada levanta asuntu ne’e liuhusi sesaun plenária, iha sala plenária Parlamentu Nasionál (PN), tersa ne’e.

 Notísia relevante : CLN klarifika kona-ba destruisaun ba koto no fore-rai tonelada 102

Iha loron 17 janeiru, ekipa Autoridade Inspesaun Fiskalizasaun Ekonómia no Sanitária Institutu Públiku (AIFAESA, I.P) akompaña ekipa CLN halo destroisaun ba produtu ai-han tonelada 102 tanba konsidera produtu ne’e liu ona prazu.

Prezidente CLN, António de Araújo Soares, esplika katak destruisaun ba produtu sira ne’e rai ona durante tinan-rua no labele konsume ona.

Nune’e, atu evita destruisaun iha futuru, mak CLN komprometidu sei tau prioridade fó kapasitasaun ba tékniku sira nune’e bele halo jestaun armazenamentu.

Husu AIFAESA kontrola sasán liu prazu

Iha sorin seluk, Deputada bankada Governu husi Congresso Nacional da Reconstrução Timorense (CNRT), Cedelízia Farria dos Santos, hakarak apresia ho serbisu AIFAESA, I.P nian, ne’ebé halo kontrola no inspesaun iha fatin ba estabelesimentu komerisál hanesan loja kiik no boot sira iha kapitál Dili no munisípiu, maibé nia fó hanoin atu kontrola loja xineza no kioske kiik sira.

“Iha loja barak ita sosa sasán iha loja xineza no kioske ne’ebé iha viziñu ho populasaun fa’an produtu hanesan manutolu no sosis barak mak ladi’ak,” nia akresenta.

Deputada ne’e husu mós Ministériu Komérsiu Indústria (MKI) atu kontrola tabela presu ne’ebé loja sira iha hodi proteje konsumidór nia direitu.

Jornalista     : Nelson de Sousa

Editora          : Julia Chatarina

iklan
iklan

Leave a Reply

iklan
error: Content is protected !!