BOBONARO, 28 janeiru 2025 (TATOLI)—Konsellu Munisipál Kombatente Libertasaun Nasionál (CMCLN, sigla Portugués) Bobonaro, segunda ne’e, hahú simu formuláriu reklamasaun husi kombatente no veteranu sira-ne’ebé la satisfas ho lista editál veteranu rejistadu 2009 ne’ebé públika husi Ministeriu Asuntu Kombatente Libertasaun Nasionál (MAKLN), kuarta (15 janeiru 2025) liubá.
Vice Prezidente CMCLN Munisípiu Bobonaro, Lucio Dinis Marques, hatete antes ne’e ekipa CMCLN entrega ona fixa reklamasaun no kontestasaun ba veteranu no kombatente sira atu prienxe.
Notisía Relevante: Veteranu iha Bobonaro lamenta lista validasaun kombatente rejistadu 2009
“Atu hateten katak reklamasaun no kontestasaun ne’e ohin segunda-feira mak foin entrega. Maibé, kona-bá hira-hira ne’e ami labele fó sai niá númeru, tanba ohin mak foin entrega formuláriu ne’ebé sira prienxe tíha ona. Sira hatama, ami tau hamutuk no rejista hotu ona mak ami lori ba Dili,” Lucio Dinis Marqués ‘Onsar’ informa ba Agência Tatoli iha kna’ar fatin, segunda ne’e.
Formuláriu ne’ebé MAKLN no Konsellu Nasionál haruka mai la sufisiente, nune’e CMCLN Bobonaro deside Kopia tan, tanba kombatente barak mak hakarak halo reklamasaun ba ema-ne’ebé la halo serbisu, maibé naran sai iha lista editál no halo kontestasaun tanba tinan ne’ebé públika la apár ho dedikasuan durante períodu rezisténsia.
“Ami sei fó de’it formuláriu ba, sira hatama mai mak ami rejista na’in hira mak simu formuláriu ne’e, depois mak ami fó sai. Tanba, ida mai dehan fó ida, depois ida mai tan dehan fó ida mai, ita rejista oinsá. Maibé, iha 15 marsu ne’e, reklamasaun no kontestasaun hotu-hotu tenke tama ona, para ami prepara lista hodi ba Dili. Se liui 15 marsu mak formuláriu sira-ne’e ami sei la simu, tanba nia prazu ne’e to’o loron 60 nia laran de’it,” nia dehan.
Tuir Agência TATOLI nia observasaun iha terrenu,segunda ne’e, nota katak veteranu no kombatente sira kontinua hakbesik-aan ba edifisíu CMCLN Bobonaro hodi foti fixa reklamasaun no kontestasaun.
Enkuantu totál lista Kombatente Libertasaun Nasionál Munisípiu Bobonaro rejistadu 2009 hamutuk 10,966, ne’ebé kompostu husi postu administrativu Átabae 1,219, Balibo 902, Bobonaro 3,997, Cailaco 1,425, Loloto’e 1,634 no Maliana 1,789.
Notísia Relevante: CCLN imprime ona fixa reklamasaun no kontestasaun provizóriu 155 ba veteranu
Jornalista : Sérgio da Cruz
Editór : Cancio Ximenes
