Responsável Rejiaun Haksolok Oé-Cusse husu MAKLN reverifika dadus editál 2009
OÉ-CUSSE, 28 Janeiru 2025 (TATOLI) – Frente Klandestina husi Organizasaun Rezisténsia Rejiaun Haksolok iha Rejiaun Administrativa Espesiál Oé-Cusse Ambeno (RAEOA), rekuza no lamenta, inklui husi halo reverifikasaun ba lista editál 2029, ne’ebé públika husi Ministériu Asuntu Kombatente Libertasaun Nasionál (MAKLN) tanba iha kombatente balun deskonfia komete manipulasaun dadus.
Ezijénsia ne’e hato’o husi Portavós Frente Klandestina husi Organizasaun Rezisténsia Rejiaun Haksolok, Adelino Cau “Sukit Kanaleko” liuhusi konferénsia imprensa ne’ebé hala’o iha Oé-Cusse.
Notísia relevante:CCLN Oé-Cusse seidauk simu reklamasaun husi veteranu no kombatente
“Ami responsável Frente Klandestina Regiaun Haksolok Oé-Cusse, la satisfaz ba lista editál 2009. Tanba ema resisténsia husi postu administrativu haat iha na’in-149 mak 8 a 14 no 15 a 19 na’in-tolu. Mak liuhusi konferénsia ne’e, ami husu ba parte kompetente atu justifika kombatente hirak-ne’e, tanba sira falsifika dokumentu, kona-ba kombatente libertasaun nasionál referidu no husu atu anula sira,” lamenta Portavós ne’e.
Relembra, Responsável ne’e hato’o faktu husi falsifikakasaun dokumentu Veteranu 2003 nian, iha loron 13 Janeiru 2025, iha Tribunal Primeira Instánsia Oé-Cusse. Notifika ona ema na’in-11, atu halo indemnizasaun, maibé Responsavél OCRN orgaun 8 la aseita ho motivu ne’e tanba sei buka autór sira.
“Bazeia ba rezultadu tribunál distritál Oé-Cusse, ami aproveita konferénsia imprensa ne’e, husu ba Ministériu Públiku atu loke prosesu investigasaun ba suspeitu na’in-6 ne’e atu tuir prosesu julgamentu,” nia ezije.
Iha fatin hanesan, membru organizasaun rezisténsia, Pedro da Costa Lelan ‘Sikat Let’, konsidera lista editál 2009 iha erru barak, nune’e persiza haree ho hadi’a.
“Naran balun iha iha lista editál, uluk ami servisu nakukun ami koñese malu, to’o ikus ne’e sira mak ka’er fali kaixa ne’e, ne’e imposivel tanba kaixa tau iha ai-laran la’os iha vila. Ami akuza tanba balu simu tiha ona pensaun tinan 4 a 7, maibé agora naran sai fali iha 8 a 14, ne’e konsidera falsifikasaun ona, ne’ebé ami husu komisaun verifika sira tenke haree ida-ne’e, ami sei ko’alia nafatin, ami la nonok,” katak nia.
Hataan kestaun, Sekretáriu Exekutivu Konsellu Veteranu RAEOA, Xisto de Souza, husu atu prenxe fixa kontestasaun ba veteranu no komabatente sira-ne’ebé la satifas ho lista editál 2029.
“Sira-nia direitu, karik la satisfáz ho lista editál ne’e, agora Ministériu prepara ona fixa kontestasaun, sira-bele mai foti atu prienxe, atu identifka se mak tama iha faze hahú, hatutan no hakotu, tanba la’ós Oé-Cusse de’it maibé munisipíu hotu enfrenta problema hanesan, maibé dalan mak ne’e hatama ka prienxe fixa kontestasaun,” nia sujere.
Totál lista editál ne’ebé aprovada husi Ministériu Asuntu Kombatente Libertasaun Nasionál (MACLN), hamutuk 3.571, kompostu husi sub-rejiaun Pante Makasar 1.704, sub-rejiaun Oésilo 833, sub-rejiaun Pássabe 357 no sub-rejiaun Nítibe na’in-677.
Notísia relevante:Oan Soru dezafia kombatente ezije Estadu konserva istória
Jornalista: Abílio Elo Nini
Editór: Florencio Miranda Ximenes
