iklan

NASIONÁL, HEADLINE, SAÚDE

Komisaun F nota INFPM nia jestaun ba ai-moruk iha mudansa di’ak

Komisaun F nota INFPM nia jestaun ba ai-moruk iha mudansa di’ak

Prezidente Komisaun F Parlamentu Nasionál, Maria Gorumali Barreto, akompaña husi membru Komisaun, halo fiskalizasaun ba INFPM, iha Kampu Alor, kinta (30/01). Imajen Tatoli/Francisco Sony

DILI, 30 janeiru 2025 (TATOLI)—Komisaun F ne’ebé trata Asuntu Saúde, Seguransa Sosiál no Igualdade Jéneru, kinta ne’e, halo fiskalizasaun ba Institutu Nasionál Farmásia Produtu Medikamentu (INFPM) nia armazen hodi haree direita jestaun ba ai-moruk.

“Ohin ita mai halo fiskalizasaun iha armazen INFPM nian, ami haree katak iha mudansa boot  ne’ebé mak sira halo, liuliu oinsá mak sira atu arma ai-moruk hodi haree tuir ninia fatin no lista sira ne’ebé  bele hatama ba iha sistema M-supply  nomós sistema kontrolu ai-moruk sira, entaun ita haree katak iha mudansa ne’ebé di’ak,” Prezidente Komisaun F, Maria Gorumali Barreto, informa ba jornalista sira, iha armazen INFPM, Kampu Alor.

Membru Komisaun F nota, tékniku INFPM tau tuir ai-moruk tuir prateleira, ne’ebé fásil atu kontrola nia stock, nune’e mós tenke iha tékniku ruma iha armazen atu bainhira iha orientasaun ruma foti ai-moruk, bele hatene ona atu foti iha prateleira sira.

“Ita haree katak INFPM nia sistema ne’e kontroladu no mudansa ba asuntu ne’e,  entaun iha buat hotu ne’ebé mak ami haree katak laiha rekomendasaun maka’as  ba  institutu nia armazen no nia servisu, maibé  hanesan Komisaun F presiza halo fiskalizasaun ba Diresaun Nasionál Farmásia no Medikamentu (DNFM) ne’ebé mak iha Ministériu Saúde nian atu haree sistema kontrolu ne’e oinsá,” nia akresenta.

Notísia relevante : INFPM simu ai-moruk item neen husi Austrália

Komisaun F mai halo fiskalizasaun hodi haree mós ba stock ai-moruk iha armazen, tanba Diretór INFPM hato’o katak dalaruma stock ai-moruk iha, maibé iha DNFM nia sistema autorizasaun mai tarde.

“Entaun afeta ba stock out ne’ebé mak akontese, ho nune’e mak ami presiza halo fiskalizazaun ba sira atu haree katak ho razaun saida mak buat hotu la’o tarde,” Deputada ne’e tenik.

INFPM distribui ai-moruk bazeia ba pedidu

Iha fatin hanesan, Diretór Ezekutivu INFPM, Brígido Dias, hateten, durante ne’e INFPM halo distribuisaun ai-moruk ba fasilidade saúde sira banhira sira submete pedidu. Daudaun institutu iha ona armazen iha rejionál tolu hanesan Baucau, Maliana no Ainaro. Tanba ne’e, bainhira fasilidade saúde sira hato’o pedidu ai-moruk ba armazen rejionál mak laiha mak INFPM sentrál bele distribui.

“Tanba ne’e mak públiku sira tenke hatene kona-ba INFPM no DNFPM tanba durante stock ai-moruk laiha, sira husi Diresaun Nasionál Farmasia Produtu Médiku mak kontrola iha fasilidade saúde sira hanesan sentru saúde to’o ospitál sira, bainhira sira akumula hotu dadus mak oin mai INFPM halo prosesu distribuisaun, entaun ami-nia autoridade ne’e husi armazen rejionál bainhira sira-nia stock ai-moruk laiha, ami sentrál bele distribui,” Brígido Dias katak.

Nune’e mós, Diretora Armazenamentu iha INFPM, Cesaltina Bento Gomes, relata, daudaun ne’e  ai-moruk hamutuk 576 ka ekivalente 30% iha armazen mak stock mamuk.

Armazen sentrál stock out  30%, hahú husi loron 10 to’o 21 janeiru 2025.

“Iha semana kotuk, 10 janeiru to’o 21 janeiru stock jerál ne’ebé sei disponível iha armazen INFPM hamutuk item 1.940 no iha item ai-moruk hamutuk 576 ne’ebé stock laiha no daudaun ne’e iha hamutukv1.364 ka ekivalente 70% husi item ai-moruk ne’ebé iha,” Diretora Cesaltina Bento  Gomes, esplika.

Nia dehan, ai-moruk sira ne’ebé stock laiha mak hanesan vital, esensiál no nesesáriu ne’ebé durante utiliza iha fasilidade saúde sira.

“Ai-moruk vitál ne’ebé iha hamutuk 133 (77%) no stock ne’ebé mak laiha hamutuk 39 (23%), ida-ne’e uza halo tratamentu ba kazu emerjénsia sira, agora ba esensiál stock ne’ebé iha hanesan 198 (74%) no stock ne’ebé iha 68 (26%), ida-ne’e hanesan ai-moruk vitamina sira. Agora ba iha nesesáriu stock ne’ebé iha hamutuk 173 (61%), stock out ne’ebé iha 110 (39%), ida-ne’e ba ai-moruk parasetamol no amoxilin sira, maibé stock ai-moruk ne’e la’ós permanente nia tenke númeru tun sae tanba kada loron pedidu mai sempre stock menus hela deit,” nia katak.

Jornalista     : Felicidade Ximenes

Editora          : Julia Chatarina

iklan
iklan

Leave a Reply

iklan
error: Content is protected !!