OÉ-CUSSE, 30 Janeiru 2025 (TATOLI)– Ministériu Solidariedade Sosiál no Inkluzaun (MSSI), oferese ai-han nutritivu no hala’o vizita domisiliáriu ba pasiente lepra na’in-23 iha Rejiaun Administrativa Espesiál Oé-Cusse Ambeno (RAEOA).
“Ami ho ministériu sira seluk hala’o servisu integradu hodi prontu fó apoiu ai-han nutritivu ba ita boot sira, ne’e signifika katak ami hadomi imi no kontinua tuir prosesu tratamentu,” dehan Ministra Solidariedade Sosiál no Inkluzaun (MSSI), Veronica Das Dores, iha otél Ambeno Oé-Cusse.
Notísia relevante:MSSI koopera MS tau-matan ba pasiente lepra 23 iha RAEOA
Apoia ne’e atu tulun pasiente moras lepra hanesan mekanizmu ida hodi hases maluk sira-nia hanoin husi moras ne’e.
“Maibé fó hanoin de’it katak, tuir matenek na’in-sira iha saúde sempre informa, ai-han tolu mak labele han hanesan ai-manas, supermie no ikan lata (sardina). Ne’e mak nesesidade ne’ebé ami apoia la inklui iha laran, maibé fó de’it saida mak han atu sustenta ita-nia moris, no hemu ai-moruk para vida naruk liutan”, Ministra ne’e enkoraja.
Ai-han ne’ebé apoia ho pakotementu mak hanesan, foos, forremunggu, susu-been, mina, koto, biskuit, la inklui iha laran mak susubeen-enak, supermie no ikan sardina lata.
Pasiente Lepra agradese
Pasiénte lepra, Manuel Beno husi suku Taiboko sub-rejiaun Pante Makasar, sente kontente tanba Governu liuhusi MSSI bele tau-matan hodi oferese ai-han nutritivu balun.
“Ha’u kontente, tanba ajuda ami ho ai-han, maske la barak maibé sufisiente ba ami-nia nesesidade família. Tanba kontinua husu atu tau-matan mai ami liuliu atendimentu saúde, ami koopera ona ho saúde atu hetan tratamentu. Hanesan ha’u agora hemu ai-moruk durante fulan-23 ona,” nia agradese.
Notísia relevante:MSSI sei apoia ai-han ba ema ho defisiénsia 582 iha Oé-Cusse
Jornalista: Abílio Elo Nini
Editór: Florencio Miranda Ximenes
