DILI, 04 fevereiru 2025 (TATOLI)—Prezidente Komisaun Funsaun Públika, Agostinho Letêncio de Deus, hateten implementasaun Lei Reforma Obrigatória ba funsionáriu hahú tinan oin.
“Lei reforma ne’e husi Parlamentu fó bá Governu durante loron 180 atubele hahú ona prosesu reforma. Agora daudaun, bolu dehan prosesu reintegrasaun, entaun presiza loron 180 atu haree ida-ne’e. Maibé, tempu loloos para ita atu halo reformasaun ne’e, ita sei tama bá iha janeiru 2026,” Agostinho hateten iha nia intervensaun bainhira partisipa iha serimónia pose ba funsionáriu foun Ministériu Justisa na’in 74 ne’ebé hala’o iha salaun Ministériu Justisa, Colmera, tersa ne’e.
Nia dehan, agora daudaun iha hela faze reintegrasaun katak iha reforma ne’e la diskute sira ne’ebé idade 65, maibé mós haree bá funsionáriu ne’ebé mak moras.
Notísia relevante: PN aprova proposta-lei reforma obrigatóriu ba FP ho idade 65
“Ita mós sei ko’alia ho Ministériu Saúde atubele define sira-nia estatutu moras ne’e, tanba iha balun ne’ebé moras ne’e sira sei rekupera fali no balun dalaruma iha prosesu nia laran. Ida-ne’e mak presiza loron 180 hodi aplika Lei Reforma Obrigatória atu atende kazu sira-ne’e,” Agostinho esplika.
Nia hatutan, funsionáriu públiku ne’ebé tama ona iha lista reforma tuir baze dadus husi Komisaun Funsaun Públika iha ema na’in 2000.
Jornalista: Natalino Costa
Editór: Xisto Freitas da Piedade