DILI, 28 Fevereiru 2025 (TATOLI)-Benedictus Ardiyanto Priyo nu’udar CEO Telkomcel, hatete Telkomcel kompromete hodi enkoraja inovasaun no aselera transformasaun dijitál iha Timor-Leste (TL) liuhusi organizasaun Telkomcel Simeira Internasionál Anuál (TAIS) 2025.
Telkomcel lansa ona programa ho inisiativa atu apoiu dezenvimentu sistema dijitál iha Timor-Leste (TL).
Nia dehan, Telkomcel nu’udar fornesedór servisu telekomunikasaun prinsipál ida iha TL ne’ebé hala’o papel importante dudu transformasaun dijitál iha nasaun ne’e ho rede ida-ne’ebé konfiavel, no solusaun dijitál sira ne’ebé foun liu. Telkomcel la’ós de’it hatán ba nesesidade komunikasaun pesoál, maibé mós aumenta produtividade negósiu no apoia setór governu nian.
“Empreza sente orgullu tebes ho diversidade husi nia funsionariu sira ho 95% husi Telkomcel nia empregadu liu 200 maka talentu lokál, no 75% husi pozisaun jestór sira okupa husi oan-mane no oan-feto sira ne’ebé di’ak husi Timor-Leste”, Priyo hatutan.
Nia informa, Telkomcel mós apoia igualdade jéneru, ho funsionáriu feto 50%, ne’ebé hatudu ninia kompromisu ba inkluzividade no dezenvolvimentu lideransa. Ho fundasaun ne’ebé metin iha inovasaun, empoderamentu lokál no igualdade jéneru, Telkomcel kontinua sai nu’udar xave hodi forma futuru dijitál ba TL.
Tinan ne’e, Telkomcel aprezenta momentu istóriku ida hodi introdús inisializasaun (showcase startup) teknolojia dahuluk iha TL, pasu ida importante hodi apoiu ekosistema dijitál ne’ebé dezenvolve liu iha nasaun ne’e.
Nu’udar fornesedór servisu telekomunikasaun prinsipál, nia akresenta, Telkomcel kontinua halo inovasaun liuhusi aprezenta solusaun dijitál sira ne’ebé la’ós de’it hatán ba nesesidade komunikasaun komunidade nian, maibé mos enkoraja kreximentu ekonómiku, produtividade negósiu, no setór governu nian.
Alende showcase dijital startup Telkomcel agora ne’e lori startup sira hanesan Nodeflux ne’ebé envolve iha área Vision AI, Cakap iha Edutech, Good Doctor iha Health Tech, no Widya Robotics, ne’ebé bele loke oportunidade foun no aumenta impaktu pozitivu ba ekosistema dijitál iha Indonézia, liuliu iha Timor-Leste, tenik tan.
Telkomcel kontinua apoia avansu teknolojia sira no hein katak inisiativa ida-ne’e bele solusiona sira ne’ebé maka fó benéfisiu ba komunidade. Telkomcel fiar katak ho hasoru malu husi parte oioin iha plataforma estratejiku ida hanesan TAIS, futuru sei fó impaktu pozitivu ba povu.
TAIS 2025 hanesan manifestasaun real ida husi kompromisu Telkomcel nian hodi enkoraja inovasaun hodi hakbiit nasaun, tuir slogan kapasita ba inovasaun (Empowering Innovation), no hakbiit Nasaun (Empowering the Nation).
“Liuhusi TAIS 2025, Telkomcel hakarak hametin kolaborasaun ho parte oioin hodi kria ekosistema dijital ida ne’ebé inkluzivu no sustentavel”, dehan Benedictus.
Eventu ida-ne’e aprezenta inisiativa oioin husi oradór prinsipál sira ne’ebé fahe esperiénsia kona-ba tendensia no estratejia sira konaba transformasaun dijitál nian ne’ebé aliña ho vizaun dezenvolvimentu nasionál.
Embaixadór Indonézia ba Timor Leste, Okto Durinus Manik, kongratula Telkomcel ne’ebé bele organiza eventu ne’e.
Nune’e mós Primeiru Ministru, Kay Rala Xanana Gusmao, hatete Telkomcel nu’udar kompañia telekomunikasaun oinsá mak bele hetan lukru maibé bainhira hetan osan barak ona fahe fali. Telekomunikasaun Telkomcel nia ezijensia iha Timor-Leste apoiu mos sosiál no seluk tan.
“Kongratulasaun ba Telkomcel ne’ebé bele organiza eventu Tais Telkomcel Annual International Summit (TAIS) 2025”, dehan PM Xanana.
Notísia relevante: Telkomcel konvida PM halo abertura ba simeira kona-ba Teknolojia, Kultura no Turizmu
Jornalista : Osória Marques
Editora : Rita Almeida
