KOVALIMA, 06 Marsu 2025 (TATOLI) – Diretora servisu edukasaun munisípiu Kovalima, Elda de Fatima, fó hanoin ba dirijente estabelesimentu ensinu katak presiza kuda ai-oan iha resintu eskola sira.
“Kondisaun eskola iha Kamenasa di’ak ona tanba haree ba infraestrutura eskola di’ak ona maibé profesór pre-eskolár no Eskola bázika filiál Kamenasa, ohin ita mai iha ne’e oinsá atu hamatak eskola”, dirijente, Elda de Fatima hato’o liuhusi nia diskursu iha resintu eskola pre-eskolár Kamenasa, ohin.
Atu hamatak eskola, hanesan dirijente edukasaun entrega ba inan-aman hamutuk ho profesór sira, tanba daudaun ne’e la iha ai-mahon nune’e sente manas nune’e presiza atu hamatak eskola ne’e hanesan maneira profesór sira.
“Presiza atu hamatak eskola nune’e bainhira loron seluk ami vizita fali eskola iha oin seluk ona, ida-ne’e edukasaun entrega ba profesór sira, oinsá atu halo jestaun tanba ita haree eskola iha Kamenasa infraestrutura di’ak ona kompleta ho fasilidade sira”, nia fó hanoin.
Profesór João Amaral reforsa katak eskola Kamanasa konsidera rekomendasaun husi edukasaun, tanba haree kondisaun infraestrutura di’ak ona maibé presiza duni atu hamatak eskola.
“Ami iha ona planu nune’e ami hakarak eskola sai buras nune’e hanesan profesór hamutuk ho alunu sira sei halo jardin, to’os eskolár nune’e ami bele kuda ai-han ne’ebé mak fó benefísiu ba alunu sira”, nia promete.
Tuir dadus profesór ne’ebé hanorin iha pre-eskolár Kamenasa ho nia Eskola bázika filiál profesór hamutuk na’in sia kompostu husi profesór pre-eskolár na’in-rua no profesór husi EBF na’in-hitu.
Alunu hahú pre-eskolár to’o EBF Kamenasa hamutuk 300 kompostu husi alunu husi pre-eskolár 40 no alunu husi primeiru siklu to’o sestu ano hamutuk 260.
Notísia relevante:ME inaugura no entrega xave eskola tolu iha Kovalima
Jornalista: Celestina Teles
Editór: Rafael Ximenes de A. Belo
