DILI, 06 Marsu 2025 (TATOLI)-Governu liuhusi Ministériu Edukasaun (ME) atribui ona diploma alunu finalista tinan 2024 nian ba eskola sira hotu iha territóriu.
“Diploma ba alunu finalista tinan 2024, tantu ba Ensinu Báziku, Ensinu Sekundáriu Jerál no Ensinu Tékniku Vokasionál, ita fahe ona ba servisu edukasaun munisípal desde Janeiru”, Koordenadór Gabinete Unidade Kurríkulu Nasionál, João Maupelu, dehan iha salaun City8, Manleuana, kinta ne’e.
Nia hatutan prosesu sira-ne’e hotu diretór eskola mak responsável tantu prenxe valór, identidade kada alunu nian iha diploma.
“Diretór Servisu Edukasaun Munisipál mak bolu diretór eskola sira hodi halo desiminasaun oinsá prenxe diploma no fahe ba estudante sira. Ida-ne’e ami kontaktu ona diretór munisipál sira no sira dehan fahe ona ba eskola sira”, nia dehan.
Koordenadór dehan totál diploma ne’ebé Ministériu Edukasaun fahe ba eskola sira hamutuk rihun 55-resin.
“Ita-nia diploma ba alunu sira; Ensinu Báziku purvolta rihun-28, Ensinu Sekundáriu Jerál rihun-23 no Ensinu Tékniku Vokasionál hamutuk rihun-haat-resin”, relata
Nia hatutan, “ha’u atu esplika klaru liután katak diploma tinan ne’e la hanesan tinan-tinan, tinan ne’e fahe ba eskola mak prenxe alunu nia biografia, valór no diretór eskola mak asina, la’ós ona Diretór Servisu Edukasaun Munisipál. Uluk Diretór Servisu Edukasaun Munisipál maibé Diretór eskola sira-ne’ebé mak hetan nomeasaun hodi Komisaun Funsaun Públika mak sei asina diploma”.
Nia esplika diretór servisu edukasaun munisipál kontrolu de’it prosesu hotu-hotu iha eskola sira hotu no legaliza ne’e munisipál mak halo.
Ministra Edukasaun, Dulce de Jesus Soares, hatutan diploma sira-ne’e agora iha hotu ona eskola no agora faze oinsá atu prenxe husi diretór eskola sira.
Kona-ba diretór eskola ne’ebé halo krime ligadu ho asédiu seksuál ho aluna, Ministra Dulce hatán ME iha regra hodi jere ida-ne’e.
Notísia relevante: Abríl to’o juñu, ME legaliza ona diploma 1.655 husi eskola sekundáriu
Jornalista : Osória Marques
Editora : Rita Almeida
