DILI, 06 Marsu 2025 (TATOLI)—Sekretáriu Estadu Komunikasaun Sosiál, Expedito Loro Dias Ximenes, hala’o enkontru ho delegasaun husi Institutu Tony Blair, ekipa Adjunta Kaza Sivíl Prezidénsia Repúblika, hodi ko’alia kona-ba progresu implementasaun ba programa no atividade ne’ebé mak durante ne’e Prezidénsia Repúblika implementa ona.
Institutu Tony Blair nu’udár institutu ne’ebé hetan fiar husi Prezidénsia Repúblika hodi servisu hamutuk ho Kaza Sivíl Prezidénsia Repúblika halo avaliasaun ba progresu implementasaun ba programa no atividade husi Prezidénsia Repúblika hanesan adventura kurida maratona, kultura no festivál Rabilau.
Ho nune’e, Institutu Tony Blair ho Kaza Sivíl Prezidénsia Repúblika hala’o ona enkontru ho liña ministeriál inklui Sekretaria Estadu Komunikasaun Sosiál (SEKOMS) hodi husu kona-ba persepsaun SEKOMS nian liuliu iha parte mídia oinsá mídia nia haree kona-ba progresu implementasaun ba programa no atividade ne’ebé mak durante ne’e Prezidénsia Repúblika hala’o.
“Ohin ha’u akompañadu husi diretór sira, diretór jerál, Prezidente Tatoli, Prezidente RTTL atubele fó hanoin to’o ne’ebé ona persepsaun mídia kona-ba progresu implementasaun ba programa no atividade ne’ebé mak durante ne’e Prezidénsia Repúblika implementa ona,” Expedito hateten ba jornalista sira iha Palácio do Governo, kinta ne’e.
Iha fatin hanesan, Adjunta Kaza Sivíl Prezidénsia Repúblika, Hendriqueta Maria da Silva, hateten durante ne’e Kaza Sivíl Prezidénsia Repúblika servisu hamutuk ho Institutu Tony Blair hodi hala’o avaliasaun ba programa no atividade ne’ebé durante ne’e Prezidénsia Repúblika halo ona nune’e públiku bele hatene nia progresu.
“Rezultadu seidauk iha ba ida-ne’e. Tanba agora daudaun Institutu Tony Blair ajuda halo avaliasaun hela,” nia adianta.
Entretantu, Diretór Jerál Institutu Tony Blair, Michael Purdon, informa Institutu Tony Blair serviu ho Adjuntu Kaza Sivíl Prezidénsia Repúblika atu halo avaliasaun ba atividade sira-ne’ebé mak durante ne’e Prezidénsia Repúblika halo ona, atubele hatene kona-ba programa sira ne’ebé implementadu ona, liuliu haree bá hira mak implemeta ona no hira mak seidauk implementadu, nune’e bá-oin kontinua promove Timor-Leste no konvida ema barak mai vizita Timor.
Jornalista: Natalino Costa
Editór: Xisto Freitas da Piedade
