DILI, 10 Marsu 2025 (TATOLI)—Deputadu Bankada Opozisaun husi Frente Revolsionáriu Indepedente Timor-Leste (FRETILIN), Antonino Doutel Sarmento, husu ba Ministériu Solidariedade Sosiál no Inkluzaun (MSSI) atu tau atensaun ba pagamentu pensaun sosiál ba ema ho defisiénsia, tanba benefisiáriu programa balun seidauk asesu direitu ne’e to’o agora.
“Preokupasaun lubun ne’ebé ita-nia komunidade aprezenta iha baze, liuliu ita-nia ema ho defisiénsia sira iha Turiskai, iha suku Liurai ne’e iha ema 25, suku Manumera iha ema ho defisiénsia idozu ida to’o ohin loron seidauk hetan direitu hanesan tuir Konstituisaun hateten,” Deputadu levanta kestaun ne’e liuhusi reuniaun plenária iha Parlamentu Nasionál (PN), segunda ne’e.
Notísia relevante : MSSI kontinua prioriza programa atendimentu sosiál iha OJE 2025
Nia dehan, ema ho defisiénsia balun to’o agora seidauk hetan nia direitu tanba laiha dokumentu sira, nune’e husu autoridade kompetente sira atu fasilita.
“To’o iha ne’ebé ona Solidariedade Sosiál, Sekretariadu Tékniku Administrasaun Eleitorál no Servisu Rejistu Notariadu atu fó atendimentu hodi bele hetan dokumentu trata sira-nia subsídiu husi Governu, ida ne’e importante tebes,” nia akresenta.
Nune’e mós, Deputadu Bankada FRETILIN, António Calau, foti kestaun liga ba ninia kontaktu eleitorál iha postu Laga-Baukau, ne’ebé komunidade sujere pagamentu idozu hala’o fulan-rua dala-ida hodi atende nesesidade.
Reprezentante Governu, liuhusi Vise-Ministru asuntu Parlamentár, Adérito Hugo da Costa, rejista preokupasaun no sei enkamiña ba ministériu tutela hodi tau atensaun.
Governu prevee millaun $111 iha tinan 2025 ba pagamentu pensaun sosiál ba idozu no invalidés iha territóriu tomak, ho totál benefisiáriu rihun 120.
Institutu Nasionál Seguransa Sosiál (INSS) iha tinan 2024 ne’e rejistu benefisiáriu foun hamutuk 5.000-resin.
Iha inísiu tinan2024 INSS halo pagamentu pensaun sosiál ne’ebé mak sei fahe ba kategoria tolu ho nia valór pagamentu la hanesan, idade 60-70 hetan pagamentu $60, idade 70-80 ho valór $80 no idade 80 ba leten ho nia valór $100.
Jornalista : Nelson de Sousa
Editora : Julia Chatarina
