DILI, 10 Marsu 2025 (TATOLI) — Liga ho kazu asédiu seksuál ne’ebé komete hosi Diretór sesante Eskola Sekundáriu Nicolau Lobato ne’e, estudante ne’ebé nu’udar vítima ohin hahú ona tuir prosesu ensinu no aprendizajen.
“Liga ho kazu ba diretór sesante ne’e iha hela prosesu, ne’ebé ha’u-nia kolega diretór ne’e agora suspende hela hodi hein desizaun husi nasionál mai. Maibé ba ita-nia alin estudante ne’e ohin hahú fali ona nia prosesu aprendizajen”, Diretór Interinu Eskola Sekundáriu Jerál Nicolau Lobato, Rui Lopes, informa ba TATOLI, iha nia knaar fatin, Komoro, segunda ne’e.
“Iha biban ohin ichar Bandeira, ha’u informa ba estudante hotu-hotu iha eskola ne’e inklui profesór evita atu buat ne’e labele akontese, no labele provoka-malu ba buat-ne’ebé liu ona. Labele hasai liafuan ruma ne’ebé ladi’ak ba nia (estudante), ida-ne’e ha’u lakohi atu akontese. Ha’u fó hatene profesór sira atu haree no kontrola estudante sira”.
Direjente Interinu ne’e fó korajen estudante feto ne’e hodi kontinua nia prosesu aprendizajen tanba futuru importante, kona-ba kazu ne’e husik nasionál mak foti desizaun.
“Ohin mós ha’u ho inspetór husi Ministériu Edukasaun bolu estudante ne’e hodi korajen no motiva nia hodi labele hanoin barak maibé importante mak ita-nia futuru nune’e tenke forsa hodi kontinua ita-nia estudu ida-ne’e. Ha’u dehan prosesu ba nia katak kazu ne’e kontinua la’o, no ida-ne’e responsável nasionál nian. Ita hein de’it desizaun saida mak nasionál sei foti ba Diretór sensante ne’e”, nia dehan.
Nu’udar manorin ida iha eskola referida sente triste tanba tuir loloos situasaun hanesan ne’e labele akontese.
“Sira hanesan ami-nia oan, karik sira falta eskola ka tarde mai eskola, ita (eskola) bolu hanorin, maibé ikus sai tiha nune’e, eskola bolu, sai tiha problema boot ida. Maibé akontese ona mas la signifika ita-nia prosesu aprendizajen atu la la’o, lae”.
Ministra Edukasaun Dulce de Jesus Soares, la tolera asaun asédiu sexuál ne’ebé mak komete husi manorin iha eskola no kondena manorin ne’ebé mak komete asaun ne’e hodi loke prosesu disiplinár atu autór bele responsável ba nia asaun referidu.
“Bainhira ami rona informasaun ida-ne’e imediatamente ha’u hato’o intrusaun ba inspesaun jerál no mós ba inpetór iha área eskola referida, hodi halo kedas levantamentu informasaun prelimináriu no informasaun ne’e ami haruka kedas ba Komisaun Funsaun Públika hodi husu atu loke prosesu disiplinár ba iha asaun ne’e”, Ministra informa.
Jornalista:Osória Marques
Editór: Evaristo Soares Martins
