DILI, 14 Marsu 2025 (TATOLI)—Governu liuhusi Ministériu Negósiu Estranjeiru no Kooperasaun (MNEK) lansa ofisialmente kampaña nasionál dalan ba ASEAN ho objetivu atu sensibiliza ba komunidade importánsia husi adezaun Timor-Leste ba ASEAN.
Notísia Relevante: PN sei kria komisaun ida apoiu Timor-Leste adere ba ASEAN
Dalan ba ASEAN ne’e lansa husi Vise-Primeiru-Ministru, Francisco Kalbuadi Lay no akompaña husi Ministériu Negósiu Estranjeiru no Kooperasaun, Bendito Freitas, Vise-Ministra ba Asuntu ASEAN, Milena Rangel, ho prezensa husi Membru Governu, Embaixadór sira husi nasaun ASEAN, kórpu diplomátiku husi nasaun viziñu doador no parseiru sira.
Programa sensibilizasaun Dalan bá ASEAN ne’e MNEK servisu hamutuk ho Ministériu Administrasaun Estatál (MAE) liuhusi Autoridade Munisípiu sira no hetan apoiu husi Embaixada Uniain Europeia, hodi disemina informasaun ba komunidade iha Timor laran tomak kona-ba estatutu ASEAN, prinsípiu, objetivu nia benefísiu sira no rona mós hanoin komunidade nian.
“Kampaña sensibilizasaun Dalan ba ASEAN ne’e pertinente tebes, tanba ne’e polítika nasionál estadu nian ne’ebé atu lori Timor-Leste sai família ida iha ASEAN,” Ministru Bendito hateten iha nia intervensaun iha edifisiu MNEK, kinta (13 Marsu 2025).
Governante ne’e akresenta, Malázia nu’udar Prezidénsia ba ASEAN 2025 hamutuk ho Estadu-membru sira fó apoiu másimu, atu Timor-Leste bele sai ona membru plenu ba ASEAN iha tinan 2025 ne’e.
Iha IV Governu Konstitusionál Sekretáriu Estadu ba ASEAN, Roberto Soares, halo ona kampaña sensibilizasaun ba komunidade iha Timor laran tomak.
Tanba ne’e, Governu Konstitusionál da-sia (IX) liuhusi MNEK sei reforsa liután programa sensibilizasaun ne’e, hodi fahe informasaun ba komunidade kona-ba Timor-Leste ne’ebé hakarak tama ba ASEAN ho nia benefísiu sira.
Notísia Relevante: TL hein notifikasaun husi ASEAN halo negosiasaun ba akordu komérsiu
Jornalista : Hortencio Sanchez
Editór : Cancio Ximenes
