DILI, 17 Marsu 2025 (TATOLI)–Eskola Portuguesa de Dili (EPD) hein desizaun husi Ezekutivu Portugál atu avansa ho konstrusaun eskola foun iha área Kaikoli.
Diretór EPD, Manuel Alexandre Marques, hatete hasoru malu ona iha fulan liubá, iha Lisboa, ho Diresaun Jerál Konstrusaun Eskolár sira hosi Ministériu Obra Públika Portugés-nian hodi ko’alia kona-ba kestaun sira ne’ebé relasionadu ho projetu.
“Ita atu iha eskola ida ba estudante rihun rua resin ne’ebé sei harii ho eskola foun ida. Maibé iha momentu ne’e, Lisboa iha ona informasaun ne’ebé presiza atu konstrusaun hahú”, tenik Manuel Marques ba TATOLI iha Balide Dili.
Diretór kalkula konstrusaun bele gasta liu euro millaun sanulu, ne’ebé ekivale ho dólar besik millaun 11.
Antes ne’e Ministru Justisa, Sérgio Hornai, ho nia omólogu portugés, Rita Júdice, asina ona iha fulan-Juñu tinan liubá, akordu ida hodi fó rai ho metru kuadradu rihun 14-resin iha área Kaikoli nian ba konstrusaun eskola foun EPD nian.
Nia lembra iha 2023, Manuel Alexandre Marques informa ona ba Xefe Governu Portugés iha momentu ne’ebá, António Costa, katak sala sira iha estabelesimentu eskolár atuál nakonu tanba aumentu signifikativu iha númeru alunu sira.
EPD ne’e harii iha 2002, kobre nivel edukasaun pre-eskolár, ensinu báziku no sekundária, dezde nia fundasaun. EPD simu ona estudante sira hosi nasionalidade timoroan, portugés no sira seluk, agora daudaun iha estudante hamutuk 1.300 resin.
Notísia relevante: Ministru Justisa estabelese akordu konsensaun atribuisaun rai ba Governu Portugal
Jornalista : Osória Marques
Editora : Rita Almeida
