DILI, 19 Marsu 2025 (TATOLI)-Diretór Eskola ba Ensinu Sekundáriu Jerál (ESJ) 4 Setembru Balide, Sergio Alfredo da Cruz, hatete ninia parte ho inan-aman sira konkorda ona atu eskola mak prepara farda, nune’e inan-aman sira sosa de’it.
“Ami enkontru ona ho inan-aman no inan-aman konkorda ona ho programa ne’ebé Ministériu Edukasaun hatún mai eskola no inan-aman fó fiar katak eskola prepara no inan-aman sosa”, dehan nia ba TATOLI iha Balide, kuarta ne’e.
Nia hatutan, eskola prepara farda ho pakote ida mak faru mutin, kalsa no saia, depois kamizeta (kaos) no roupa ba ezersísiu-nian. Ida-ne’e tuir modellu no kores ne’ebé ministériu hatún mai eskola.
“Ne’e signifika, faru, saia, kalsa, kaos (kamizeta) no training (roupa ezersísiu/desportiva) nian ne’ebé kompleta ho naran, emblema eskola, emblema Ministériu Edukasaun inklui ho sintu ida mak ho kustu $50”, nia dehan.
Tuir orientasaun ne’ebé Ministériu Edukasaun fó sai katak antes tama trimestre segundu bele utiliza ona uniforme eskolár ne’e.
Iha fatin seluk, Diretór Jerál Ministériu Edukasaun, Deolindo da Cruz, informa ninia parte nafatin iha faze diskusaun entre eskola ho inan-aman.
“Uniforme eskolár antes ne’e ita lansa ofisiál nasionál iha tinan kotuk, momentu ne’ebá ita informa ona no disemina ona ba diretór eskola hotu, aumesmu tempu baze legal regula kona-ba uniforme ne’e rasik distribui ona”, katak nia.
Nia dehan, bainhira prosesu ne’e la’o mak inan-aman sira nia-oan iha-ona desimu primeiru no desimu segundu iha sekundáriu, primeiru, segundu ho terseiru siklu sira hakarak suku ba nia oan sira ne’e laiha problema.
Notísia relevante: ME dissemina unifome eskolár ba dirijente eskola antes implementa
Jornalista : Osória Marques
Editora : Rita Almeida
