DILI, 24 Marsu 2025 (TATOLI)–Prezidente Komisaun F iha Parlamentu Nasionál (PN) ne’ebé trata asuntu Saúde, Igualidade Jéneru no Inkluzaun Sosiál, Maria Gorumali Barreto, husu ba ministériu responsável atu tau atensaun urjente halo manutensaun ba ambulánsia multifunsaun iha sentru saúde sira hotu iha territóriu.
“Manutensaun ambulánsia multifunsaun ne’ebé konsentra iha sentru saúde sira hotu tanba kuaze maioria ho kondisaun a’at no to’o agora seidauk halo manutensaun. Situasaun mak hanesan maluk Deputadu sira hato’o difikulta hodi fasilita transfere pasiente sira husi postu bá sentru saúde no sentru saúde bá ospitál referál. Entaun ho kondisaun ne’e, ami husu Vise-Ministru (asuntu Parlamentár) atu tau konsiderasaun ba asuntu urjente, informa ba Ministériu Saúde hodi halo manutensaun urjentemente,” Reprezentante povu ne’e hato’o liuhusi reuniaun plenária PN, segunda ne’e.
Nune’e mós, Deputada Bankada Governu husi Kongresu Nasionál Rekonstrusaun Timorense (CNRT) ne’e husu atu tau atensaun ba servisu turnu no oras estra husi profisionál saúde ne’ebé hahú husi setembru 2024 to’o agora seidauk halo pagamentu.
“Ita haree Orsamentu Jerál Estadu (OJE) 2024 mós iha kategoria saláriu no vensimentu ne’e osan iha ne’ebá, maibé tanba sá mak la halo pagamentu, ida-ne’e mak mosu problema husi profisionál saúde sira ne’ebé afeta ba sira-nia serbisu,’’ nia akresenta.
Notísia relevante : SNAEM sosa ambulánsia lima apoia ba servisu saúde iha munisípiu
Iha fatin hanesan, Deputadu Bankada opozisaun husi Partidu Libertasaun Populár (PLP), Helder Freitas Kamarudi, haktuir, foin lalais Komisaun F halo fiskalizasaun iha Bobonaru, liuliu iha postu Kailaku no deteta problema hanesan ambulánsia ho kondisaun a’at kuaze fulan-lima ona, rekursu hanesan parteira menus, freezer tau ran laiha, no ai-moruk la kompletu.
Nune’e mós, Deputadu Opozisaun husi Kmanek Haburas Unidade Nasionál Timoroan (KHUNTO), Luís Roberto no Deputada PLP, Maria Angelina Sarmento, preokupa foin lalais MS atribui ambulánsia ida ba Prezidénsia Repúblika, ne’ebé loloos presiza haree mekanizmu atribuisaun tuir prioridade tanba povu iha área remota presiza loos ambulánsia, tanba ne’e presiza destakamentu iha sentru saúde sira hodi halo atendimentu ba povu.
Reprezentante Governu liuhusi Vise-Ministru asuntu Parlamentár, Adérito Hugo da Costa, rejista preokupasaun ne’e no sei envia ba ministériu tutela hodi tau atensaun.
Tuir dadus husi Servisu Nasionál Ambulánsia Emerjénsia Médiku (SNAEM), totál ambulánsia iha tinan 2024, iha munisípiu 12 inklui Rejiaun Administrativa Espesiál Oekusi Ambenu (RAEOA) hamutuk 58, husi númeru ne’e ho kondisaun di’ak iha 25, aumenta foun lima, nune’e ambulánsia ne’ebé daudaun halo operasaun iha 30.
Ambulánsia a’at no labele hadi’a hamutuk 28, SNAEM entrega ona ba Patrimóniu Estadu. Servisu Nasionál identifika ona ambulánsia foun lima ne’ebé simu iha tinan 2024 atu koloka iha munisípiu Aileu, Lautein, Kovalima, iha Aeroportu Internasionál Prezidente Nicolau Lobato no ida iha SNAEM nasionál.
Iha tinan 2025, sei aloka tan $300.000 atu sosa ambulánsia foun lima.
Jornalista : Nelson de Sousa
Editora : Julia Chatarina
